Tags-Hunar

haañ koī bhī hunar ḳhaas mujh meñ nahīñ
kyuuñ zamāna rahā DhūñDhtā phir mujhe

kyā batā.eñ ki tere kūche se
kis hunar kis kamāl se guzre

faqat lafzoñ se ham 'dānā' hunar kī daad lete haiñ
qalam vaale kabhī shauq-e-adākārī nahīñ rakhte

is tā.ife meñ ek kamī hai to aap kī
ai dushmanān-e-ilm-o-hunar raqs kījiye

dastār-e-hunar baḳhshish-e-darbār nahīñ hai
sad shukr ki shānoñ pe ye sar baar nahīñ hai

'vaqār' shaḳhs ki shā.ir na us kī fikr na fan
tamām aib haiñ chāhe to sab hunar kar de

usī ḳhush-navā meñ haiñ sab hunar mujhe pahle thā na qayās bhī
usī ḳhush-navā pe sajā hai kyā mirī shā.irī kā libās bhī

chaliye jādūgaroñ kī bastī meñ
apne aiboñ ko bhī hunar kar leñ

ham ko aate nahīñ andāz-e-hunar-mandī-e-fan
ye alag baat ki tauqīr-e-hunar jānte haiñ

vo kisī kā bhī na thā lekin thā sab kā mo'tabar
koī kyā jaane ki us meñ ik hunar aisā bhī thā

ye hunar bhī baḌā zarūrī hai
kitnā jhuk kar kise salām karo

salīqa ye bhī to hai sar uThā ke jiine kā
jo ham meñ aib haiñ in ko hunar banāyā jaa.e

'shārib' maiñ chhupūñ laakh zamāne kī nazar se
lekin ḳhabar-e-aib-o-hunar ho ke rahegī

sab ke jauhar nazar meñ aa.e 'dard'
be-hunar tū ne kuchh hunar na kiyā

maiñ us ke sāmne gum-sum rahā suḳhan-basta
na kar sakā kabhī arz-e-hunar kī jur.at bhī

hunar kī kār-gah se shai ajab nikal aa.e
maiñ din banātā rahūñ aur vo shab nikal aa.e

is ko ġhazal samajh ke hī sarsarī dekhiye sahī
ye mirā hāl-e-dil bhī hai arz-e-hunar ke saath saath

jahāñ pe taaq haiñ buġhz-o-riyā ke fan meñ tamām
us ek shaḳhs ne iḳhlās ko hunar jaanā

sahrā se bhī vīrāñ mirā ghar hai ki nahīñ hai
is tarah se jiinā bhī hunar hai ki nahīñ hai

kitnā dushvār thā duniyā ye hunar aanā bhī
tujh se hī fāsla rakhnā tujhe apnānā bhī