Tags-Hunar

'qā.em' maiñ reḳhta ko diyā ḳhil.at-e-qubūl
varna ye pesh-e-ahl-e-hunar kyā kamāl thā

bīnā.ī-e-nāqis kā karishma hai ye 'turfa'
aiboñ meñ nazar aayā hunar vaqt se pahle

vo mujhe sun ke baḌī der se chup hai 'qaisar'
jaane us ko mirī ġhazloñ kā hunar kaisā lagā

Dūbne vaalo havāoñ kā hunar kaisā lagā
ye kinārā ye samundar ye bhañvar kaisā lagā

aql-o-ilm-o-hunar ke sāñche meñ
zindagī ḳhud hamīñ banāte haiñ

ki ham dhoke meñ rakkheñ dostoñ ko ḳhush-kalāmī se
hameñ aa hī gayā ye bhī hunar āhista āhista

fan kī pagDanDiyoñ pe chalte hue
kabhī bhaTke to be-hunar bhaTke

mire uyuub kī tasvīr is tarah khīñchī
mire hunar ko pas-e-pusht us ne Daal diyā

jaan kar chup haiñ vagarna ham bhī
baat karne kā hunar jānte haiñ

ho taḌap to dil meñ ġhazal bane ho milan to giit huuñ pyaar ke
haañ ajiib shaḳhs thā 'indirā' jo sikhā ke aise hunar gayā

lutf-e-īzadī hī se ummīd hai inshā-allāh
kuchh nahīñ rakhte haiñ ham fazl o hunar kā takiya

ye hunar bhī āḳhir ko us ne siikh kar chhoḌā
ham se hosh-mandoñ ko be-ḳhabar banāne kā

lahū kā hunar āzmāte raheñge
charāġh āñdhiy.oñ meñ jalāte raheñge

jin kī nazar meñ hech hai tāj-e-hunar 'na.īm'
un ke huzūr maiñ kyā mirī iltimās kyā

ye zalālat na jhelnī paḌtī
bā-hunar se jo be-hunar hotā

mere hī ruḳh kā araq jauahr-e-gul-hā-e-hunar
zar-garī kaam mirā zaḳhm muqaddar mere

hai vahī lā-hāsilī dast-e-hunar kī muntazir
āḳhirash sar phoḌtā hai kohkan koī bhī ho

yahāñ rāste bhī haiñ be-shajar hai munāfiqat bhī yahāñ hunar
mujhe apne aap pe faḳhr hai ki maiñ kāmyāb nahīñ rahā

sarsoñ lagā ke paañv talak dil huā huuñ maiñ
yaañ lag hunar meñ ishq ke kāmil huā huuñ maiñ

jabhī to ḳhār-e-dil-e-dostāñ nahīñ huuñ abhī
ki aib mujh meñ bahut haiñ hunar ziyāda nahīñ