Tags-Hunar

kisī kī narm-nigāhī kī aañch hai varna
ye dil-pazīr navā jalva-e-hunar bhī nahīñ

tishnagī maiñ ne bujhā lī ye hunar thā varna
ḳhizr kā dil bhī rah-e-umr meñ pyāsā niklā

chhupā na paayā kabhī ḳhud ko apne sheroñ meñ
maiñ jo huuñ jaisā huuñ apne hunar meñ aa gayā huuñ

chhoḌ gayā vo naqsh-e-hunar apnā tuġhyānī meñ
ek shanāvar thā jo utrā gahre paanī meñ

daad jāñkāhī kī kis se paa.eñ ab ahl-e-hunar
ḳhūñ-chakīdā ḳhāma ristī uñgliyāñ dekhegā kaun

na thī haal kī jab hameñ apne ḳhabar rahe dekhte auroñ ke aib o hunar
paḌī apnī burā.iyoñ par jo nazar to nigāh meñ koī burā na rahā

'vaqār' tum suḳhn-o-āgahī se guzre ho
tumhī ko pās-e-'vaqār'-e-hunar bhī rakhnā hai

hasb-e-murād dast-e-hunar bolne lagā
gūñge ne chand aise ishāre banā.e the

ai be-hunar sambhal kar chal rāh-e-shā.irī meñ
fan-e-suḳhan ke māhir ahbāb dekhte haiñ

har baat kā behtar hai chhupānā hī ki ye bhī
hai aib kare koī jo zāhir hunar apnā

jī rahe haiñ āfiyat meñ to hunar ḳhvāboñ kā hai
ab bhī lagtā hai ki ye saarā safar ḳhvāboñ kā hai

bigaḌtā zaḳhm-e-hunar āshkārā karnā paḌā
hameñ bhī daad kā marham gavārā karnā paḌā

tumhāre paas haiñ ilm-o-hunar sab
hamāre paas bas ik bachpanā hai

ahl-e-hunar ke dil meñ dhaḌakte haiñ sab ke dil
saare jahāñ kā dard hamāre jigar meñ hai

sitam ke vaar haiñ to kyā qalam ke dhaar bhī to haiñ
guzāra ḳhuub kar lete haiñ izzat se hunar vaale

havā kā aisā zor thā ki ik balā kā shor thā
isī fazā meñ jo the bā-hunar charāġh jal ga.e

mohabbat ik na ik din ye hunar tum ko sikhā degī
baġhāvat par utarnā aur ḳhud-muḳhtār ho jaanā

jhuuT bolūñ to chipak jaa.e zabāñ taalū se
jhuuT likkhūñ to mirā haath hunar ko tarse

lafz-o-bayāñ ke pas-manzar tak ik qaus-e-imkānī aur
merī jast-e-hunar ko likh de koī samt-e-ma.ānī aur

zauq-e-gunāh o azm-e-pashemāñ liye hue
kyā kyā hunar haiñ hazrat-e-insāñ liye hue