Tags-Hunar

dast-e-qātil kā hunar laakh chhupā.e lekin
āb-e-ḳhanjar na sahī zaḳhm-e-gulū boltā hai

ye samajh lo ki vo hai ilm-o-hunar kā madfan
jab kisī shahr meñ tum ġhalba-e-mullā dekho

'shahbāz' meñ aib hī nahīñ kul
ek aadh koī hunar bhī hogā

dāman-e-dard ko gulzār banā rakkhā hai
aao ik din dil-e-pur-ḳhūñ kā hunar to dekho

rahī hamesha darīda qabā-e-jism tamām
kabhī na dast-e-hunar-mand se rafū hue ham

hunar-mandoñ kī har majlis se ye āvāz aatī hai
ki nādāñ kā koī duniyā meñ 'rahbar' ho nahīñ saktā

lamhe meñ palaT deñge zamāne ko tumhāre
hai ahd-e-hunar jaan ye tasḳhīr nahīñ hai

ḳhudā ne saada qalam se banāyā ham sab ko
tire vajūd ko apne hunar se joḌā hai

ek ek kar ke jitne hunar the vo chhin ga.e
ham zindagī se kyuuñ na hoñ bezār āj-kal

ilm-o-hunar hai mulk ko darkār āj-kal
ham ḳhud bhale-bure ke haiñ muḳhtār āj-kal

jo chāheñ yaar se kahīñ aġhyār ġham nahīñ
ḳhvāja ko haiñ ġhulām ke aib-o-hunar khule

kuchh nahīñ aatā to ḳhushāmad hī siikh
haath meñ koī to hunar chāhiye

vafā kī ḳhū na jiddat dushmanī meñ
ye duniyā be-hunar sī ho ga.ī hai

but-garī meñ hunar bhī shāmil thā
sañg-sāzī se hoshiyār the ham

sunā hai us ko bhī hai sher o shā.irī se shaġhaf
so ham bhī mo.ajize apne hunar ke dekhte haiñ

kahte haiñ jise jiine kā hunar āsān bhī hai dushvār bhī hai
ḳhvāboñ se milī taskīñ bhī bahut ḳhvāboñ ke uḌe purze bhī bahut

'manzar' apne ḳhuun se is shāḳh ko sarsabz kar
gar zabāñ miT jā.egī terā hunar dekhegā kaun

aap hī kī hai adālat aap hī munsif bhī haiñ
ye to kahiye aap ke aib-o-hunar dekhegā kaun

aib kyūñkar hoñ be-hunar meñ 'obaid'
aib to bā-hunar meñ rahte haiñ