Tags-Hunar

be-hunar haath chamakne lagā sūraj kī tarah
aaj ham kis se mile aaj kise chhū aa.e

jānte the chāplūsī kā hunar
kaam phir bhī dūsrā karte rahe

tilism-e-aks-o-sadā se nikle to dil ne jaanā
ye harf kuchh kah rahe haiñ arz-e-hunar se aage

aib bhī tere hunar lagte haiñ
terī furqat kā samar lagte haiñ

apne hī ġham ġhalat hoñ suḳhan se bahut hai ye
aisā hunar kahāñ ki ise shaad kar sakūñ

ishq meñ ain hunar-mandī hai
sab jise be-hunarī kahte haiñ

jaane kyā soch ke ghar tak pahuñchā
maiñ ki me.arāj-e-hunar tak pahuñchā

ḳhushāmad chāplūsī jhuuT ġhībat
hamāre paas to koī hunar na.iiñ

maiñ nauhe kab nahīñ likhtā huuñ raftagāñ ke 'zafar'
kab ashk misl-e-hurūf-e-hunar nahīñ aate

aur kuchh is ke sivā ahl-e-nazar jānte haiñ
pagḌiyāñ apnī bachāne kā hunar jānte haiñ

tez-gāmī jis shikam kī aag hai
us se bachnā hai hunar āhista chal

chhalak na jā.ūñ kahīñ maiñ vajūd se apne
hunar diyā hai to phir zarf-e-kibriyā.ī de

ham apne jazba-o-ehsās le ke pahuñche the
tamām khel vahāñ haath ke hunar kā thā

ye kāvish-e-afkār matā-e-dil-o-jāñ hai
rakhte haiñ agar kuchh to yahī naqd-e-hunar ham

hameñ bhī ruuTh jaane kā hunar to ḳhuub aatā hai
agar vo had se baḌh kar jān-e-jāñ ham ko satā.eñge

ai hunar-varī tire ism chup ye amal ramal ke tilism chup
ye hazār gun se bhare haiñ kyā kisī bhāg-vand ke sāmne

jo sach likhogī to phir kuchh na likh sakogī 'nasīm'
qalam meñ ma.anī badalne kā bhī hunar rakkho

ḳhayāl aag hai sho.ala hai fikr lau alfāz
ye sab hunar haiñ to phir is hunar meñ ham bhī haiñ

maiñ apnī fikr kī tajsīm kis tarah se karūñ
burīda-dast huuñ aur shahr-e-be-hunar meñ huuñ

sajā.e rakkhā hai ham ko anā kī suulī par
koī agar hai to bas ye hunar malāl kā hai