Tags-Hunar

tujhe āgahī kī nahīñ ḳhabar mirī gumrahī pe na tanz kar
are vaqt vaqt kī baat hai yahī aib rashk-e-hunar bhī hai

harf us ke qāmat-e-tahsīñ pe sajte hī ga.e
'shāhid' un ko is tarah harf-e-hunar maiñ ne kiyā

mujh ko sho.aloñ meñ bhī jiine kā sikhātā hai hunar
ik samundar mire ātish-kada-e-jāñ meñ kahīñ

ahl-e-zamāna dekhte haiñ aib hī ko bas
kyā fā.eda jo 'sheftā' arz-e-hunar kareñ

maiñ jis hunar se huuñ poshīda apnī ġhazloñ meñ
usī tarah vo chhupā saarī kā.enāt meñ hai

tujh ko vaise to zamāne ke hunar aate haiñ
pyaar aatā hai kabhī tujh ko batā aatā hai

kis hunar ke muzāhire meñ ho
tum to ḳhud se muqāble meñ ho

jo āshnā.ī ke ḳhanjar se āshnā haiñ 'sa.ūd'
vo dast-e-dost ke saare hunar samajhte haiñ

khulnā thā apne aib o hunar kā bharam kahāñ
ye bhī huā to qāfiya-paimā.ī se huā

bisāt-e-dānish-o-harf-o-hunar kahāñ kholeñ
ye sochte haiñ lab-e-mo'tabar kahāñ kholeñ

riste hue nāsūr pe chalte rahe nashtar
taaza hī rahā phuul sadā zaḳhm-e-hunar kā

idhar se jhāñkte haiñ gah udhar se dekh lete haiñ
ġharaz ham us kī sūrat sau hunar se dekh lete haiñ

dil mahv-e-sadā-e-dard kyuuñ hai
ye arz-e-hunar-gudāz kyā hai

chorī meñ dil kī vo hunar kar gayā
dekhte hī āñkhoñ meñ ghar kar gayā

ye to maiñ thā ki tarāshā hai har ik zaḳhm se phuul
haath kaT jaate haiñ nāḳhun meñ hunar hone tak

ik kitāb-e-sad-hunar tashrīh-e-zā.il kā shikār
ek mohmal baat jaadū kā asar kartī huī

bahut āsān thā kār-e-hunar bhī
mire hāthoñ hunar aane se pahle

āte-jāte har-nafas meñ maut kā thā zā.iqa
rā.egāñ jiine meñ marne kā hunar rakkhā gayā

jānte haiñ hunar mohabbat kā
ahl-e-dil meñ shumār haiñ ham log

tasvīr kā har rañg nazar meñ hai
kyā baat tire dast-e-hunar meñ hai