Tags-Aasraa

tañg mat kar ai zamīñ kar deñ ishāra ik agar
āsmānoñ se bhī ham ko aasrā mil jā.egā

kahte haiñ ek shaḳhs kī ḳhātir jiye to kyā
achchhā yūñhī sahī to koī aasrā na ho

koī rasta nikal hī aatā hai
ik zarā aasrā kare koī

vā dareġhā thā dil-e-bīmār-e-ġham ko aasrā
āb-e-teġh-e-nāz se ik din mujhe hogī shifā

hazār qaid-e-javāñ se chhuT kar bahār kā aasrā kareñge
bahār bhī ham qafas-zadoñ ko na raas aa.ī to kyā kareñge

merī kashtī ko nāḳhudā kā nahīñ
tund-maujoñ kā aasrā hogā

diyā apnā bujhā do ḳhud hī 'shā.er'
havā-e-nīm-shab kā aasrā kyā

jinheñ āgahī meñ milā aasrā
na phir vo kisī bhī amaañ tak ga.e

kahūñ kyā hastī-e-nā-mo.atabar huuñ
tirā hī aasrā hai aur maiñ huuñ

muqaddas ho gayā hai jhuuT merā
mujhe to ab usī kā aasrā hai

shab-e-firāq vo halkī sī ik shuā-e-umīd
vo sub.h tak mire jiine kā aasrā honā

kam se kam thā ik tarah kā aasrā iqrār tak
lekin un ko saaf ab inkār karnā aa gayā

tamām shahr kī ta.amīr dhuup ne kī hai
milegī chhāñv bhī us kā hī aasrā le kar

navāzish un kī muhtāj-e-mohabbat
mirī kam-mā.egī kā aasrā hai

vahī azaab vahī aasrā bhī jiine kā
vo merā dil hī nahīñ zaḳhm bhī hai siine kā

kahā ye kis ne kahāñ se ye sun ke aa.e ho
jo be-sahārā haiñ vo aasrā nahīñ hote

dīvār-e-ḳhastagī huuñ mujhe haath mat lagā
maiñ gir paḌūñgā dekh mujhe aasrā na de

banāyā jaatā agar Tahniyoñ se pinjre ko
qafas meñ kuchh to parindoñ ko aasrā hotā

rahe jo zindagī meñ zindagī kā aasrā ho kar
vahī nikle sarīr-ārā qayāmat meñ ḳhudā ho kar

aasrā un kī rahbarī Thahrī
jin kī ḳhud rahzanī meñ guzrī hai