Tags-Aasraa

vahī aziim hai jo bāñTtā ho dard-e-vajūd
usī ke vasl kā 'rāshid' hai aasrā mujh ko

tumheñ ḳhabar bhī hai ye tum ne kis se kyā māñgā
bhañvar meñ Dūbne vāloñ se aasrā māñgā

hujūm-e-isyāñ se kuchh nahīñ Dar samajh chukā huuñ ba-roz-e-mahshar
hai us kī rahmat kā saaya sar par to kyuuñ kahūñ aasrā nahīñ hai

sukūñ milegā unheñ kis ke āstāne par
vo ahl-e-dard jinheñ terā aasrā na milā

maiñ to barbād ho gayā huuñ magar
ab kisī ko na aasrā denā

shāmil kisī kā haath hai merī uThān meñ
ye bel jo chaḌhī to koī aasrā liye

us ke dukh-dard meñ sharīk rahe
dil-zada dil kā aasrā bhī haiñ

chain se shahr-e-ḳhamoshāñ meñ har ik sotā hai
aasrā sab ko hai ai vāda-e-fardā terā

nādīda manziloñ ke musāfir the kitne log
chalnā thā jin kā kaam magar aasrā na thā

bulandī pe jin ko bhī dekhā ye paayā sabhī aasrā DhūñDte phir rahe haiñ
kise sarparastī ke qābil samajhiye jiye jā rahe haiñ ḳhud apne sahāre

jo ḳhud dast-e-talab phailā rahā ho
sakhī bhī ho to us kā aasrā kyā

tumhārī bazm meñ lab khol kar huā ḳhāmosh
vo bad-nasīb jise koī aasrā na milā

azal se us kā hī aasrā hai jo dene vaalā murādoñ kā hai
barā.e-fil-faur umīd-e-dil ko jo chūmne us ke dar ko chaliye

maiñ chand pal jo use thoḌā aasrā de duuñ
phir umr-bhar ke liye kul jahān māñgegā

mire ḳhat ko us ne na jab paḌhā mire nāma-bar ko bhī ġham huā
kahā muddatoñ kā jo aasrā thā vo aaj tum ne miTā diyā

jī meñ aatā hai ki ab ahd-e-vafā bhī toḌ duuñ
un ko pā saktā huuñ maiñ ye aasrā bhī toḌ duuñ

aasrā jab bhī koī TuuTe hai
ek chhālā sā dil meñ phūTe hai

hausle apne rahnumā to hue
hādse ġham kā aasrā to hue

us ke dil se apnā andāz-e-taġhāful pūchhiye
jis ke dil ko dard kā bhī aasrā miltā nahīñ

dard apnā kuchh aur hai davā hai kuchh aur
TuuTe hue dil kā aasrā hai kuchh aur