Tags-Aasraa

mirī nigāh ko jalvoñ kā hausla de do
guzar-basar kā koī bhī to aasrā de do

jagmagā uThtī hai dil meñ ik muqaddas raushnī
jab nahīñ hotā kahīñ bhī aasrā mere liye

dhuup shiddat kī thī chal paḌā raah meñ
maañ kā āñchal mirā aasrā ho gayā

koī ummīd koī aasrā baaqī nahīñ chhoḌā
vafā ke pyaar ke saare sahāre bech Daale haiñ

rahegī dhuup mire sar pe āḳhirī din tak
javāñ hai peḌ magar us kā aasrā kyā hai

shikast-e-ahd ke kyuuñ hoñ na silsile qaa.em
ik aasrā pas-e-har-e'tibār baaqī hai

na kar talāsh-e-asar tiir hai lagā na lagā
jo apne bas kā nahīñ us kā aasrā na lagā

bhale hī chhāñv na de aasrā to detā hai
ye aarzū kā shajar hai ḳhizāñ-rasīda sahī

bahā lo tum hī apne saath maujo
hamārā aasrā koī nahīñ hai

umiid jab had se baḌh ga.ī ho to hāsil us kā hai nā-umīdī
bhalā na kyuuñ yaas daf.atan ho ki muddatoñ aasrā rahā hai

kisī kī jab aas TuuT jaa.e to ḳhaak vo aasrā lagā.e
shikasta dil kar ke mujh ko zālim nigāh ab kyā milā rahā hai

sa.ādat hai jo ban jaa.eñ jahāñ meñ
kisī majbūr dil kā aasrā ham

sulūk jis kā ho sab ke liye shajar jaisā
kisī bhī umr meñ bachchoñ kā aasrā na kare

chaar din meñ hī thak ga.e the qadam
phir milā ġham kā aasrā mujh ko

pukār kartā hai be-āsrā yatīm lahū
kisī ke paas samā.at kā vaqt hai na dimāġh

ye chāñdnī maiñ gilāsoñ meñ ghol duuñ na kahīñ
maiñ chāhtā huuñ vo yādoñ kā aasrā bhī na de

rah-e-hayāt meñ manzil kā aasrā kaisā
qadam qadam pe ġhubāroñ ne saath chhoḌ diyā

vaa.e aḳhtar ḳhudā ko bhuul ga.e
jab kahīñ koī aasrā dekhā

aur jo kuchh ho hameñ manzūr hai yārab magar
aadmī ko aadmī kā aasrā hone na de

aasrā allāh kā kaafī hai insāñ ke liye
haath phailā kar bashar achchhā nahīñ lagtā mujhe