Tags-Aasraa

na jaane kaun se hoñToñ kā aasrā pā kar
tumhāre hoñT mirī tishnagī ko bhuul ga.e

ek roz kho degā etimād-e-zātī bhī
aasrā takā jis ne dūsre sahāroñ kā

adam se hastī meñ jab ham aa.e na koī hamdard saath laa.e
jo apne the vo hue parā.e ab aasrā hai to bekasī kā

umr-bhar kī justujū kā hai yahī hāsil 'ziyā'
ek dīvār-e-tahayyur aasrā detī huī

tamām umr sahāroñ kī justujū meñ rahā
vo bad-nasīb jise terā aasrā na milā

shaguft-e-gul meñ bhī zaḳhm-e-jigar kī sūrat hai
kisī se ek tabassum kā aasrā bhī nahīñ

kashtiyāñ mañjdhār meñ haiñ nāḳhudā koī nahīñ
apnī himmat ke alāva aasrā koī nahīñ

ye dasht-e-hijr kī vahshat hai sāhibān-e-vafā
yahāñ kisī ko koī aasrā nahīñ miltā

ḳhizāñ nasīb daur meñ bahār kī tasalliyāñ
magar vo dil jise hai ḳhār-o-ḳhas kā aasrā bahut

dukh dard meñ hamesha jo sab kā sharīk hai
us ke sivā kisī kā mujhe aasrā nahīñ

tumheñ hai fikr ki jiine kā aasrā ho koī
maiñ chāhtā huuñ miTā duuñ kisī tarah ḳhud ko

merī hastī ko aas hai tujh se
bin tere koī aasrā hī nahīñ

tanhā tumhīñ ho jin kī mohabbat kā aasrā
un bekasoñ ke dil kī duā ho ga.e ho tum

jhūTe va.adoñ par thī apnī zindagī
ab to vo bhī aasrā jaatā rahā

ab mujhe Dhaltī huī umr kā afsos nahīñ
aasrā mere buḌhāpe kā mirā beTā hai

jaane kab bigaḌ jaa.eñ jaane kab sañvar jaa.eñ
dast-e-kūza-gar meñ haiñ apnā aasrā hī kyā

ab to nahīñ aasrā kisī kā
allāh hai apnī bekasī kā

chalo dhuup se āshnā.ī kareñ
ye dīvār kā aasrā Thiik na.iiñ

sutūn-e-reg na Thahrā 'adīm' chhat ke tale
maiñ Dah gayā huuñ ḳhud apne ko aasrā de kar

har haal meñ rahā jo tirā aasrā mujhe
māyūs kar sakā na hujūm-e-balā mujhe