Tags-Husn

aayā jo nazar husn-e-ḳhudā-dād kā jalva
but ban gayā muñh dekh ke har barahman un kā

ġhairoñ ne kabhī paak nazar se nahīñ dekhā
vo us ko na samjheñ to ye hai husn-e-zan un kā

ye fitrat husn kī hai aur vo tīnat mohabbat kī
jise tum ne jafā samjhā use ham ne vafā jaanā

zauq-e-ḳhud-bīnī ne dikhlā.ī 'sahar' apnī bahār
husn ke ma.asūm chehre par nikhār aa hī gayā

husn hai tū terā bhī charchā rahegā dā.imī
ishq huuñ maiñ aur afsāna amar merā bhī hai

be-niyāz us husn ko aur naaz ko barpā rakhe
be-takalluf ho ke tū ai nāz-parvar ham se mil

naaz parastish ban jā.egā sabr zarā ai shorish-e-dil
ulfat kī dīvāna-garī se husn abhī begāna hai

jab bhī mire aañsū bahte haiñ aur terā dāman jaltā hai
dekh ke apnā husn-e-ta.alluq har ahl-e-gulshan jaltā hai

husn-e-insāñ se fitrat kī sargoshiyāñ ghul ga.iiñ tere lahje kī jhankār meñ
fan kī takmīl sachchā sarāpā tirā, be-zabānī ko laayā jo iz.hār meñ

mujhī pe kyā hai nahīñ hai kis meñ ye but-tarāshī ye but-parastī
agar na husn-e-nazar se dekho to koī bhī phir hasīñ nahīñ hai

kyā karūñ husn kā tasavvur ab
tere chehre pe jab naqāb nahīñ

ye tez raushnī rātoñ kā husn khā ga.ī hai
tumhāre shahr meñ ham apnī chāñdnī se ga.e

vo jis ko aaj bhī kuchh log husn kahte haiñ
ba-sad-nigārish-e-paiham faroḳht hotā hai

ye ishq par husn kī ināyat ye husn se ishq kī irādat
hamārī hasrat hai aur tū hai tirī javānī hai aur ham haiñ

tū vo hai husn meñ yaktā ki tajassus meñ tire
āsmāñ le ke charāġh-e-mah-e-tābāñ niklā

na huī tāqat-e-nazzāra kisī āshiq ko
shola-e-husn hijāb-e-ruḳh-e-jānāñ niklā

ham aur tire husn-e-taġhāful se bigaḌte
jab tū ne kahā maan ga.e maan ga.e ham

palkoñ pe larazte hue taare se ye aañsū
ai husn-e-pashīmāñ tire qurbān ga.e ham

naala juz husn-e-talab ai sitam-ījād nahīñ
hai taqāzā-e-jafā shikva-e-bedād nahīñ

nigah-e-shauq se husn-e-gul-o-gulzār to dekh
āñkheñ khul jā.eñgī ye manzar-e-dīdār to dekh