Tags-Husn

husn-e-sūrat kī tarah husn-e-suḳhan hai kam-yāb
ek hotī hai hazāroñ meñ tabī.at achchhī

saj-dhaj nigah akaḌ chhab husn-o-adā-o-shoḳhī
nām-e-ḳhudā haiñ tujh meñ ai naujavān āThoñ

husn kī daulat us kī hai aur vasl kī ishrat bhī us kī
jis ne pal pal hijr meñ kaaTā jaur sahe dukh jhele haiñ

mizāj-e-husn kisī taur se badal na sakā
gavārā samjhā ġham-e-nā-gavār bhī maiñ ne

sirf parvāna adab se dam-ba-ḳhud rahtā nahīñ
tere ro.ab-e-husn se mahfil meñ tharrātī hai sham.a

husn-e-aḳhlāq se māñ-bāp kī ḳhidmat karnā
farz to hotā hai ehsān nahīñ hotā hai

matā-e-qalb-o-nazar ḳhaak hote hote bhī
jahān-e-husn kī kuchh aabrū baḌhā hī ga.ī

maiñ us ke husn kī thoḌī sī dhuup le aayā
vo āftāb to Dhalne lagā thā vaise bhī

zulf o kākul se qavī husn kā baazū hai mudām
qafas o daam rahe jaise ki sayyād ke saath

kamāl-e-husn kā jab bhī ḳhayāl aayā hai
misāl-e-sher tirā naam dil pe utrā hai

chhupe to kaise chhupe chaman meñ mirā tirā rabt-e-vālihāna
kalī kalī husn kī kahānī nazar nazar ishq kā fasāna

nāz-e-begānagī meñ kyā kuchh thā
husn kī sādgī meñ kyā kuchh thā

ai musavvir hai yahī hāsil tirī tahrīr kā
husn ḳhud hī pairahan hai husn kī tasvīr kā

ye kitāb-e-dil hai qur.ān-e-mohabbat hai huzūr
marhala dar-pesh hai is husn kī tafsīr kā

ban gayā hai isti.āra husn-e-ālam-gīr kā
ā.ina-dar-ā.ina chehra mirī tahrīr kā

aartī ham kyā utāreñ husn-e-mālā-māl kī
bujh ga.ī har jot puujā ke sunahre thaal kī

ishq ko zid hai ki ta.amīr kare shahr-e-umīd
husn kam-baḳht bad-andesh huā chāhtā hai

husn ko duniyā kī āñkhoñ se na dekh
apnī ik tarz-e-nazar ījād kar

chhīn letā hai musavvir ke sabhī hosh-o-havās
husn tasvīr mukammal nahīñ hone detā

koī dekhe tujhe to kyā dekhe
ki tirā husn hai naqāb tirā