Tags-Husn

do-chār din meñ zālim hovegī ḳhat kī shiddat
ye husn aarzī hai is par na naaz karnā

vo dil-jalā thā maiñ ki tirī sham-e-husn par
jal kar nisār sūrat-e-parvāna ho gayā

hoñ sifāt-e-nafs jis ke qalb-e-rūh
vo bashar kab hai vo husn-e-zāt hai

na kaho taġhāful-e-husn se koī kār-sāzī-e-ġham kare
ki jo aaj ġham se nikal ga.ī vo duā ḳharāb asar bhī hai

na rahā hayāt kī manziloñ meñ vo farq-e-nāz-o-niyāz bhī
ki jahāñ hai ishq barahna-pā vahīñ husn ḳhāk-basar bhī hai

tire kaif-e-husn kī jaan hai mirī be-dilī-o-fasurdagī
jise kahte haiñ ġham-e-rā.egāñ vo liye hue kuchh asar bhī hai

ḳhush ho ai ishq ki phir husn huā mā.il-e-nāz
muzhda ai jins-e-mohabbat ki ḳharīdār aayā

ġhuncha-e-basta chaTak jaag uThī mauj-e-sabā
shola-e-husn bhaḌak misr kā bāzār aayā

aabrū husn kī ho jaa.e na pāmāl-e-nazar
dekhnā ho to uTheñ ḳhud se chhupā kar dekheñ

husn-e-nazara-soz hai parda
go vo parda uThā.e baiThe haiñ

kitāb-e-ishq ke jo mo'atabar risāle haiñ
unhīñ meñ husn ke kuchh mustanad havāle haiñ

naam raushan jo huā husn meñ parvānoñ se
sham.a kahtī hai ki ThanDe raheñ jalne vaale

jis husn ke jalve haiñ aarif kī nigāhoñ meñ
vo husn banāve hai ka.abe ko sanam-ḳhānā

husn-e-tadbīr kī nigāhoñ se
dekh to apne baḳht kī tahrīr

husn ik ishq kī soī huī kaifiyyat hai
ishq hai husn kā bedār-e-vafā ho jaanā

husn kī fitrat-e-ma.asūm thī pāband-e-hijāb
ishq se siikh liyā jalva-numā ho jaanā

shikvoñ kī zafar-yābī pe mujhe ahbāb mubārakbād na deñ
vo nīchī nigāheñ merī haiñ vo husn-e-pashīmāñ merā hai

shoḳhī-e-husn shahroñ meñ yuuñ al-amāñ
saath mausam ke badleñ sanam bhī nayā

phuul ḳhud apne husn meñ gum hai
us ko kab chāhne kī fursat hai

tum ne likkhā hai mire ḳhat mujhe vāpas kar do
Dar ga.iiñ husn-e-dil-āvez kī rusvā.ī se