Tags-Husn

maiñ jo royā un kī āñkhoñ meñ bhī aañsū aa ga.e
husn kī fitrat meñ shāmil hai mohabbat kā mizāj

hasīn chehre kashīda kiye the miTTī se
balā kā ḳhaak meñ husn o jamāl rakkhā thā

ālam-e-husn ḳhudā-dād-e-butāñ hai ki jo thā
nāz-o-andāz balā-e-dil-o-jāñ hai ki jo thā

nāz-o-andāz-o-adā se tumheñ sharm aane lagī
aarzī husn kā aalam vo kahāñ hai ki jo thā

tumhāre e.ajāz-e-husn kī mere dil pe lākhoñ ināyateñ haiñ
tumhārī hī den mere zauq-e-nazar kī saarī latāfateñ haiñ

ḳhizāñ ke jaur se vāqif koī bahār na ho
kisī kā pairahan-e-husn tār-tār na ho

kashish-e-husn kī ye anjuman-ārā.ī hai
saarī duniyā tire kūche meñ simaT aa.ī hai

nigāh-e-sarsarī 'tābish' muhīt-e-husn kyā hogī
jahāñ tak dekhne kā ho taqāzā dekhte rahnā

merī fikr-e-suḳhan bhī rañgīñ hai
tere husn-e-shabāb kī sūrat

jalva-gar hai is meñ ai 'sīmāb' ik duniyā-e-husn
jām-e-jam se hai ziyāda dil kā ā.īna mujhe

ye haqīqat hai ki donoñ fitratan ma.asūm haiñ
pāk-dāman husn bhī hai ishq bhī ḳhush-nām hai

tere husn pe la.anat hai jā
terā ronā chhoḌ chukā huuñ

tire roz-e-azal se farefta haiñ tire husn-o-jamāl ke shefta haiñ
tire ishq meñ ho ga.e kushta-e-ġham vahī kar ga.e qaul jo yaar kiyā

tābish-e-husn-e-yār ne chhīn lī tāb-e-arz-e-shauq
jitne qarīb aa.e vo utne hī fāsle baḌhe

partav-e-husn huuñ is vāste mahdūd huuñ maiñ
husn ho jā.ūñ to duniyā meñ samā bhī na sakūñ

bazm-e-duniyā meñ haiñ husn-o-ishq yuuñ jalva-numā
raushnī hai sham.a meñ to soz parvāne meñ hai

tere va.ade terī yādeñ tere naġhme tere ḳhvāb
husn se bharpūr daulat mere kāshāne meñ hai

kisī ne na dekhā tire husn ko
mirī sūrat-e-hāl dekhī ga.ī

kaunain-e-ain-e-ilm meñ hai jalva-gāh-e-husn
jeb-e-ḳhirad se ainak-e-irfāñ nikāliye