Tags-Husn

ye dasht se umaD aayā hai kis kā sail-e-junūñ
ki husn-e-shahr khaḌā hai naqāb uThā.e hue

ik ishq kā ġham aafat aur us pe ye dil aafat
yā ġham na diyā hotā yā dil na diyā hotā

hazār husn dil-ārā-e-do-jahāñ hotā
nasīb ishq na hotā to rā.egāñ hotā

kiyā hai tū ne to jān-e-jahāñ jahāñ tasḳhīr
huā hai husn kā shohra tirā to ālam-gīr

tū hai jān-e-husn ye sun ke to pasīna chhūTā māthe se
mirā naam 'ārzū' sun le to vo aur bhī burā maane

ye ubhartī miTtī tahrīreñ ye bigaḌtī bantī tasvīreñ
kisī husn kī haiñ tanvīreñ koī dekhe ho to pahchāne

chārasāz ho kar bhī husn ke ye tevar haiñ
dard se taḌaptā hai soz-e-āshiqī tanhā

kab tak yuuñ parde meñ husn mohabbat ko Thukrātā
maut kā din bhī hashr kā din hai chhupne vaalo sāmne aao

husn kī laa.ī huī ek bhī aafat na ga.ī
dil kī dhaḌkan na ga.ī dard kī shiddat na ga.ī

husn-e-dilkash ise kahte haiñ ki ham saarī umr
un ko dekhā kiye dīdār kī hasrat na ga.ī

tū jo nau-vārid hai sun yaañ aish-e-hastī hai judā
husn kī sarkār meñ lafz-e-fanā kuchh aur hai

suḳhan-varī na sahī mo.ajiza sahī lekin
ye tarz-e-fikr ye husn-e-bayāñ bhī kitnī der

fitrat ke pujārī kuchh to batā kyā husn hai in gulzāroñ meñ
hai kaun sī rānā.ī āḳhir in phūloñ meñ in ḳhāroñ meñ

tū nahīñ hai to phir ai husn-e-suḳhan-sāz batā
is bhare shahr meñ ham jaise milā kis se kareñ

tapish-e-husn na parvāna banā de mujh ko
us ke nazdīk bhī jaate hue Dar lagtā hai

tire husn kā ye kamāl hai ki ḳhud aap apnī misāl hai
vo jamāl hī to jamāl hai jo kisī kā aks-e-nazar nahīñ

husn aisā ki chakā-chaund huī haiñ āñkheñ
hairat aisī ki nazzārā bhī nahīñ ho saktā

husn sar-tā-ba-qadam turfa-adā.ī chāhe
ishq tā-hadd-e-yaqīñ sāda-gumānī māñge