Tags-Husn

hashr na.e uThā.e kyuuñ husn ko gar qarār ho
husn jo be-sukūñ na ho fitne na.e jagā.e kyuuñ

mohabbat to ham ne bhī kī aur bahut kī
magar husn ko ishq karnā na aayā

us ghaḌī pūchhūñgā tujh se ye jahāñ kaisā hai
jab tire husn pe thoḌā sā zavāl aa jaa.e

nit na.e rañg bhare is meñ tasavvur ke mire
dil meñ tasvīr rahī husn-e-sarāpā ho kar

kah rahe haiñ ye hijābāt-e-tajallī mujh se
jalva-e-husn hai ḳhud husn kā parda ho kar

shauq-e-dīdār-e-talab hadd-e-adab se jo baḌhā
husn ne tāb-e-nazar chhīn lī jalva ho kar

husn-e-dilkash kā bhī kyā andāz hai
naaz goyā hai adā ḳhāmosh hai

ġhurūr-e-husn se koshish matānat iḳhtiyārī kī
tumhārī shoḳhiyoñ meñ rā.egāñ ma.alūm hotī hai

ishq hai bāzī-gar-e-mulk-e-adam
husn bhī kufrān-e-ne.amat hai yahāñ

ḳhushāmad tābedārī minnat-o-ḳhidmat sujūd-e-husn
azal se dīdanī hai bebasī-o-ājizī-e-ishq

bane husn vaale sarāpā qayāmat javānī jab aa.ī to andāz aa.e
girā.ī kabhī shoḳh nazroñ se bijlī kabhī sharm aa.ī kabhī muskurā.e

ḳhud-numā.ī kam-libāsī sab ne mil kar chhīn lī
qātilāna ik adā jo husn ke tevar meñ thī

haa.e vo husn-o-ishq jab 'bāsit'-e-be-qarār ko
barq-e-nigāh-e-dost ne phūñk diyā jalā diyā

mere mazāq-e-dīd kī sharm usī ke haath hai
jis ne shuā-e-husn ko husn-e-nazar banā diyā

jo hasīñ hai gard hai is bādshāh-e-husn kī
rahtā hai pariyoñ kī jhūmar meñ sulaimāñ āj-kal

peshtar ḳhat se mazā thā husn kā ai naunihāl
ho gayā dāġhī tirā seb-e-zanaḳhdāñ āj-kal

mere afkār-o-ḳhayālāt meñ saarī 'tābāñ'
husn-e-dillī bhī hai rānā.i-e-shīrāz bhī hai

rāhat-e-banda-e-be-dām kahāñ hai aa jā
paikar-e-husn sar-e-bām kahāñ hai aa jā