Tags-Husn

merī duniyā isī duniyā meñ kahīñ rahtī hai
varna ye duniyā kahāñ husn-e-talab thī merā

juz ġham-e-ishq koī kaam nahīñ hai so ai husn
jab mile ik na.ī hālat meñ mile haiñ tujh se

karishme husn ke sūraj sitāre phuul zāhir haiñ
magar maiñ kis taraf dekhūñ misāl-e-yār se pahle

ai hasīnān-e-jahāñ ahl-e-havas se hoshiyār
varna husn-o-ishq se marbūt afsāne ga.e

dil ke do hisse jo kar Daale the husn-o-ishq ne
ek sahrā ban gayā aur ek gulshan ho gayā

husn-e-tadbīr kā mo.ajiza dekhiye
kaam himmat se le kar zarā dekhiye

nāzish-e-fardā mirā husn-e-taġhazzul hai 'hasan'
rañj hotā aaj gar kuchh qadr farmātā koī

husn kā dil se ta.alluq dā.imī hai garm hai
varna kis kā kis se hai rishta koī naatā koī

haiñ husn ke karishme kyā inqalāb-āgīñ
ġham-ḳhvār jo the kal tak ab ḳhaar khā rahe haiñ

balā se koī haath maltā rahe
tirā husn sāñche meñ Dhaltā rahe

ye barq-e-husn jalātī to hai magar nāseh
vo aur shai hai mire sho.ala-ḳhū kī baat na kar

gurez-e-husn ko andāz-e-husn kahte haiñ
nazar se dekh magar ḳhūb-rū kī baat na kar

ham gardish-e-sāġhar ko nigāhoñ meñ liye haiñ
dekhe koī husn-e-talab-e-jām hamārā

husn sab ko ḳhudā nahīñ detā
har kisī kī nazar nahīñ hotī

tūr-e-sīnā ho ki lahore kī galiyāñ 'shohrat'
husn-e-har-rañg gurezāñ hai ḳhabar-dār raho

phir do aalam ke ujaḌne kī ghaḌī aa pahuñchī
aaj phir husn pashemāñ hai ḳhabar-dār raho

uf ye talāsh-e-husn-o-haqīqat kis jā Thahreñ jaa.eñ kahāñ
sehn-e-chaman meñ phuul khile haiñ sahrā meñ dīvāne haiñ

paḌh chuke husn kī tārīḳh ko ham tere ba.ad
ishq aage na baḌhā ek qadam tere ba.ad

husn bhī apne taqāzoñ se hai āḳhir majbūr
husn ke dosh pe ilzām-e-ḳhudā.ī na rakho

jaag jaa.e na kahīñ husn kā sotā pindār
dīda-e-shauq meñ andāz-e-gadā.ī na rakho