Tags-Husn

ishq ḳhud mā.il-e-hijāb hai aaj
husn majbūr-e-iztirāb hai aaj

kyūñkar na shab-e-mah raushan ho kyuuñ sub.h na dāman chaak kare
kuchh vasf-e-rumūz-e-husn to ho kuchh sharh-e-jamāl-e-yār to ho

husn har shai ko diyā ishq milā har dil ko
taaki āsān ho insān kā insāñ honā

aañch qurbat kī na pighlā de kahīñ tār-e-nazar
shola-e-husn ko kuchh duur se bach kar dekho

kahāñ kā husn ki ḳhud ishq ko ḳhabar na huī
rah-e-talab meñ kuchh aise bhī imtihāñ guzre

bahut hasīn manāzir bhī husn-e-fitrat ke
na jaane aaj tabī.at pe kyuuñ girāñ guzre

khul gayā ye raaz un āñkhoñ ke ashk-e-nāz se
kaifiyāt-e-husn ko ġham se judā samjhā thā maiñ

husn hai dād-e-ḳhudā ishq hai imdād-e-ḳhudā
ġhair kā daḳhl nahīñ baḳht hai apnā apnā

husn-e-amal meñ barkateñ hotī haiñ be-shumār
patthar bhī toḌiye to salīqe se toḌiye

husn hai vahm-e-mohabbat bhī gumāñ hai lekin
dil ye kahtā hai ki har vahm-o-gumāñ ko samjho

ye jo rañg-e-fikr-o-ḳhayāl hai ye tirī nazar kā kamāl hai
tirā husn thā koī aa.ina jise dekh kar maiñ sañvar gayā

tujhe hogā us kā malāl kyā mujhe hogā us kā ḳhayāl kyā
tire husn se bhī kashish ga.ī mire ishq se bhī asar gayā

donoñ ne baḌhā.ī raunaq-e-husn
shoḳhī ne kabhī kabhī hayā ne

thā e'timād-e-husn se tū is qadar tahī
ā.īna dekhne kā tujhe hausla na thā

ishq hai be-gudāz kyuuñ husn hai be-niyāz kyuuñ
merī vafā kahāñ ga.ī un kī jafā ko kyā huā

vo chehra sutā huā vo husn-e-bīmār
bechainī kī ruuh ko bhī aatā thā pyaar

hai javānī ḳhud apnī mashshāta
husn ko kis qadar nikhār aa.ī

shohrat hai mujh se husn kī is kā mujhe hai rashk
hote haiñ mustafīz mirī zindagī se aap

husn o ulfat meñ ḳhudā ne rabt paidā kar diyā
dard-e-dil mujh ko diyā tum ko masīhā kar diyā

ġhanīmat hai ki apne ġham-zadoñ ko
vo husn-e-ḳhud-nigar pahchāntā hai