Tags-Husn

laad na us ke husn kā itnā bojh 'charāġh'
aa jā.egī moch ġhazal ke shāne meñ

meve par bāġh-e-jahāñ meñ ho jo dil ko raġhbat
shajar-e-husn se maiñ seb-e-zanaḳhdāñ māñgūñ

husn kī mumlikat bahut mahdūd
ishq ke saath ek aalam hai

jab mo'atabar nahīñ thā mirā ishq-e-bad-gumāñ
ab husn-e-ḳhud-farosh kā ronā fuzūl hai

yatīm palkoñ kī shabnamī ārzūoñ kā soz le kar
ham apnī un beTiyoñ kī māñgoñ kā husn le kar

karishme ke lashkar meñ vo shāh-e-husn
saf-e-ḳhūb-rūyāñ kā sardār hai

ġhunchoñ kā fareb-e-husn tauba kāñToñ se nibāh chāhtā huuñ
dhoke diye haiñ dostoñ ne dushman kī panāh chāhtā huuñ

sitam ko husn-e-sitam kar gayā vahī varna
yahī thī zindagī lekin sazā sī lagtī thī

shaiḳh-sāhib kī namāz-e-saharī ko hai salām
husn-e-niyyat se musalle pe vazū TuuT gayā

husn ko rusvā kar ke marūñgā
āḳhir tum kyā yaad karoge

phuul meñ rañgat bhī thī ḳhushbū bhī thī aur husn bhī
us ne āvāzeñ to diiñ lekin kahāñ maiñ sun sakā

husn-o-ulfat donoñ haiñ ab ek sat.h par magar
ā.ina-dar-ā.īna bas ā.ina-dar-ā.īna

tū hamesha ai but-e-mah-laqā rahā mahv apnī hī shakl kā
tire aks-e-husn kī ārasī tire sāmne hī dharī rahī

na ḳhat aa.e par bhī kamī paḌī tirī shān-e-husn meñ yak zarī
vahī qad kī fitnagarī rahī vahī ruḳh kī jalvagarī rahī

tire ahd-e-husn meñ yak zamāñ na junūñ se mujh ko milī amaañ
vahī naala aur vahī fuġhāñ vahī mashq-e-jāma-darī rahī

gila-guzār-e-zamāna huuñ tum ḳhafā kyuuñ ho
gila to husn-e-talab hai mire gale lag jaao

iisā tilism husn taġhāful hai zīnhār
juz pusht chashm nusḳha arz davā na maañg

kisī ke husn kī tābāniyoñ kā kyā kahnā
nigāheñ ho ga.iiñ qurbān misl-e-dīvāna

maġhrūr husn kā hai tujhe ye kahāñ ḳhabar
ya.anī ki kaun hai pas-e-dīvār al-ġhiyās

shola-e-husn-e-azal rūh-e-jahāñ jān-e-hayāt
sub.h ke nuur ke mānind nigāhoñ ko munavvar kartā