Tags-Husn

vo zamīñ par qadam nahīñ rakhte
husn kā kyā ġhurūr hotā hai

guzregī kyā jamāl-e-ruḳh-e-yār dekh kar
hairat hai husn hasrat-e-dīdār dekh kar

ishq kī zaat hī se hai ḳhūbī-e-husn-o-shān-e-husn
husn ke dam-qadam se hai saarā ye soz-o-sāz-e-ishq

ishq adā-navāz-e-husn husn karishma-sāz-e-ishq
aaj se kyā azal se hai husn se sāz-bāz-e-ishq

ajab ki arz-e-tamannā ke pech-o-ḳham na khule
'shahāb' husn-e-talab ko hazār saada kiyā

hai taraqqī meñ us ḳhush-abrū kā
husn misl-e-hilāl kuchh kā kuchh

ġhāfil itnā husn pe ġhurra dhyān kidhar hai tauba kar
āḳhir ik din sūrat ye sab miTTī meñ mil jā.egī

jalva-e-husn-e-butāñ se hai agar dil kā ziyāñ
ai ḳhudā-vand mire dil kā ziyāñ aur sahī

kisī ke husn-e-samā.at pe Thes kyoñ na lage
kisī ke hoñToñ pe ab ke sadā hī aisī hai

ai shahsavār-e-nāz ye miTtā hai baar baar
tere samand-e-husn ko ham ḳhud banā.eñge

aalam meñ husn terā mash.hūr jānte haiñ
arz o samā kā us ko ham nuur jānte haiñ

jalva-e-husn-e-ḳhudā-dād dikhā kar dilbar
misl-e-ā.īna kiyā aap ne hairāñ mujh ko

tumhāre ḳhāl-o-ḳhad pe ik kitāb likh rahe the ham
magar tumhārā husn be-misāl hī nahīñ rahā

jise na husn se matlab na ishq se sarokār
vo shaḳhs mujh ko bahut bad-nasīb lagtā hai

yahāñ to husn kā dil bhī hai ġham se sad paara
maiñ kāmyāb nahīñ vo bhī kāmyāb nahīñ

ye māhtāb nahīñ hai ki āftāb nahīñ
sabhī hai husn magar ishq kā javāb nahīñ

hai hijāb-e-husn kā ye asar kisī ḳhud-parast ko kyā ḳhabar
jo azal se siine meñ josh thā vahī ban ke shor-e-fuġhāñ uThā

husn ko hosh-rubā nīm-hijābī ne kiyā
vo kabhī saaf mire sāmne aa.e na chhape

guzar gayā ye nigāhoñ se terā markab-e-husn
tamām ālam-e-dil ik qadam meñ gard huā