Tags-Husn

ra.anā.ī-e-jalva ko ba-sad husn-e-tayaqqun
ḳhud apnā hī ik aks-e-nazar ham ne kahā hai

rañg bhī āḳhir utarne meñ to kuchh letā hai vaqt
husn āḳhir husn thā jis kā nasha rahnā hī thā

hayā se husn kī qīmat do-chand hotī hai
na hoñ jo aab to motī kī aabrū kyā hai

utar saktī nahīñ husn-e-bayāñ meñ
jo rāteñ harf-e-jāñ ko kāTtī haiñ

yūñhī to dil-āvez nahīñ sher-e-'tabassum'
ye naqsh tire husn ke sāñche meñ Dhale haiñ

husn-e-ḳhirām-e-nāz se jaadū na.e jagā.e jā
jab bhī jahāñ paḌeñ qadam phuul vahīñ khilā.e jā

ai ḳhatt-e-bayāz aariz darkār hai jo tujh ko
tahrīr husn kī kuchh rūdād kyā karegā

husn kā malak ham niiñ sair kiyā
kahīñ dekhī na pyaar kī sūrat

go husn-parastī na ho ḳhātir se farāmosh
ḳhush-qāmatoñ kā yaad sarāpā na kareñge

ye shola-e-husn jaise bajtā ho sitār
har ḳhatt-e-badan kī lau meñ maddham jhankār

koī phuul ḳhushbū se chuur sā koī rañg halqa-e-nūr sā
koī husn ġhairat-e-hūr sā tire naam saarā likhā huā

husn aur ishq haiñ donoñ kāfir
donoñ meñ ik jhagḌā sā hai

nigāh-e-ishq o chashm-e-husn do sāvan ke bādal hai
ye jab milte haiñ dil par ek bijlī sī barastī hai

nairañg husn-e-dost se kar āñkheñ āshnā
mumkin nahīñ vagarna ho dīdār ek tarah

kitāb-e-ruḳh hai hijāb-e-taqdīs-e-husn-e-jānāñ
ye raaz kaisā mazāq-e-dīdār par khilā hai

kahīñ shunavā.ī nahīñ husn kī mahfil ke ḳhilāf
gul na kyuuñ hañste raheñ shor-e-anādil ke ḳhilāf

tum husn-e-mujassam ho bilā-shirkat-e-ġhaire
nā-qābil-e-taqsīm ḳhazāna hai tumhārā

jo tire pasīne kī bū na de to kuchh aur hai gul-e-tar nahīñ
jo taḌap na de tire husn kī vo bahār nañg-e-bahār hai

rafta rafta ḳhud ko dīvāna banāte jā.iye
husn kī dilchaspiyoñ ke kaam aate jā.iye

uf nikal jaatī hai ḳhatre hī kā mauqa kyuuñ na ho
husn se betāb ho jaanā mirī fitrat meñ hai