Tags-Husn

ai ārzū-e-shauq tujhe kuchh ḳhabar hai aaj
husn-e-nazar-navāz harīf-e-nazar hai aaj

jitne husn-ābād meñ pahuñche hosh-o-ḳhirad kho kar pahuñche
maal bhī to itne kā nahīñ ab jitnā kuchh mahsūl paḌā

husn-o-ishq kī an-ban kyā hai dil ke phañsāne kā phandā
apne hāthoñ ḳhud aafat meñ jā ke ye nā-māqūl paḌā

baḌe ḳhulūs se tārīk rāstoñ pe chalo
baḌe tapāk se husn-e-sahar ko yaad karo

vo mel-jol husn o basīrat meñ ab kahāñ
jo silsila thā phuul kā patthar se kaT gayā

tire jamāl se ai āftāb-e-nankāna
nikhar nikhar gayā husn-e-shu.ūr-e-rindāna

ham-nafas merī to fitrat hī sanā-e-husn hai
ishq ke bande kahā karte haiñ dīvāna mujhe

ḳhāl-o-ḳhat se aib us ke rū-e-aqdas ko nahīñ
husn hai mus.haf meñ honā nuqta-e-e.arāb kā

lāġharī ke saath betābī yahī ai bahr-e-husn
ḳhaar hai ye jism-e-lāġhar māhī-e-be-āb kā

haiñ man-o-tū jalva-e-hā-e-husn-e-vahdat kā hijāb
sham-e-bazm-e-ḳhud-shanāsī nūr-e-irfāñ kījiye

nūr-e-īmāñ surma-e-chashm-e-dil-o-jāñ kījiye
parda-dār-e-husn-e-yaktā chashm-e-hairāñ kījiye

ishq se kaam na thā husn kī parvā bhī na thī
yaad aatā hai javānī meñ laḌakpan kaisā

husn-e-be-parvā ko ḳhud se thoḌā ġhāfil dekh kar
mujh ko kyā kuchh is kā dikhlātī hai uryānī mirī

dil ke baaje meñ nahīñ ma.alūm kitne taar haiñ
husn ko ik taar kā mahram banā saktā huuñ maiñ

tū jafā meñ mast hai roz-o-shab maiñ kafan-ba-dosh ġhazal-ba-lab
tire ro.ab-e-husn se chup haiñ sab maiñ bhī chup rahūñ to mazā hai kyā

husn hī ke dam se haiñ ye kahāniyāñ saarī
ishq hī sikhātā hai ḳhush-bayāniyāñ saarī

husn qaa.em zamīñ kā rakhte hue
ek bastī na.ī basānī hai

husn-e-kāfir ho gayā āmāda-e-tark-e-jafā
phir 'asad' merī tabāhī kā zamāna aa gayā

ishq ko jab husn se nazreñ milānā aa gayā
ḳhud-ba-ḳhud ghabrā ke qadmoñ meñ zamāna aa gayā

vufūr-e-shauq meñ jab bhī kalām karte haiñ
to harf harf ko husn-e-tamām karte haiñ