Tags-Husn

ta.ayyun husn-e-maqsad kā nahīñ is ke sivā koī
Thahar jaa.eñ jahāñ ham bas use manzil samajhte haiñ

husn kī āzādiyoñ kā zikr kyā
husn agar chāhe to mahfil luuT le

guloñ ne churāyā tirā husn-e-rañgīñ
mo.attar fazā hai tire pairahan se

kisī jism kā husn hai pairahan se
kahīñ pairahan ḳhud sajā hai badan se

ai husn mujh ko husn ke sadqe kī bhiik de
phailā.e haath baiThe haiñ kis ājizī se ham

kar le qubūl-e-husn ke sadqe meñ jān-o-dil
fariyād kar rahe haiñ tirī dilbarī se ham

hai ek fitna-e-bedār husn-e-ḳhvābīda
sambhal ki ghaat meñ vo chashm-e-nīm-bāz na ho

jo us ke husn kī parchhā.iyāñ na aa.eñ nazar
to ruuh garm-e-tavāf-e-harīm-e-nāz na ho

shorish-e-āshiqī kahāñ aur merī sādgī kahāñ
husn ko tere kyā kahūñ apnī nazar ko kyā karūñ

garmi-e-ishq ne baḳhshā hai ye aalam varna
husn bedār na thā merī nazar se pahle

sabā ye bārgah-e-husn meñ ḳhabar karnā
use to chāhiye zarroñ ko bhī qamar karnā

ye samajhte hue maqsūd-e-nazar hai tū hī
maiñ tire husn kī jānib nigarāñ kyuuñ na huā

kahte haiñ husn ḳhad-o-ḳhāl kā pāband nahīñ
har hasīñ shai pe mujhe terā gumāñ kyuuñ na huā

saaqī ke husn-e-dīda-e-mai-gūñ ke sāmne
maiñ jalva-e-bahisht ko Thukrā ke pī gayā

kis husn se kahūñ maiñ us kī ḳhush-aḳhtarī kī
is māh-rū ke aage kyā taab mushtarī kī

mirī hasratoñ kā na ḳhuun kar nahīñ yuuñ na rok mirī zabāñ
mirī sard aah pe shak na kar ye to merā husn-e-kalām hai

hijāb-e-fitna-parvar ab uThā letī to achchhā thā
ḳhud apne husn ko pardā banā letī to achchhā thā

paḌe rahoge yahāñ kab talak bure hāloñ
vahāñ to husn ke sarmā.e haiñ chale jaao

aaj jo kahnā ho ai husn ḳhud-ārā kah le
kal tirī bazm meñ 'iqbāl'-umar ho ki na ho

tujh meñ kab husn-e-bahār-e-gul kī ra.anā.ī na thī
kab tire jalvoñ kī ik duniyā tamāshā.ī na thī