Tags-Husn

kyuuñ bigaḌiye husn-o-rif.at meñ kise inkār hai
aap yūsuf bhī sahī rashk-e-masīhā bhī sahī

husn takrīm sahī chāhatīñ tāzīm sahī
haath ab aap shafaq-tāb meñ dhone de mujhe

harūf-e-shauq meñ laakh intishār ho 'ḳhālid'
ḳhayāl husn-e-sarāpā se maiñ sajil kar duuñ

mizāj-e-husn kahīñ bad-maza na ho jaa.e
adal badal ke fasāne kī baat kartā huuñ

bāñsoñ ke jañgal kī chilman husn jhalaktā manzil kā
baḌhte hue qadmoñ kī taak meñ sūkhe hue pattoñ par saañp

baḌī vus.ateñ haiñ zamīn par hameñ aur chāhiye kyā magar
vo jo husn us kī nazar meñ hai koī us se baḌh kar milā nahīñ

zarā pata to chale husn-e-ahd-e-nau kyā hai
na.ī nigāh ke sāñche meñ Dhal ke dekhte haiñ

aaj vafā kā vāsta detā hai vo sitam-zarīf
jis ne ġhurūr-e-husn meñ ḳhauf-e-ḳhudā nahīñ kiyā

kyuuñ tīrgī sī chhā.ī charāġhoñ ke darmiyāñ
kyā husn chhup gayā hai naqāboñ ke darmiyāñ

husn ye hai ki dilrubā ho tum
aib ye hai ki bevafā ho tum

husn meñ fitrī hijābāna ravish ab ho na ho
ishq ke maslak meñ jo hadd-e-adab thī ab bhī hai

jamāl-o-husn ke qaa.el haiñ us ke sab 'ajmal'
bas ek tum hī yahāñ rakhte ho ajiib nazar

zabāñ-kushā.ī-e-ġham se khulī kitāb-e-ḳhayāl
varaq varaq pe khulā husn-e-mudda.ā tujh se

husn-e-zātī bhī chhupā.e se kahīñ chhuptā hai
saat pardoñ se ayaañ shāhid-e-ma.anī hogā

lākhoñ is husn pe mar jā.eñge dekhā-dekhī
koī ġhash hogā koī mahv-e-tajallī hogā

mahfileñ aur bhī haiñ husn-o-adā kī lekin
terī mahfil kī tarah ab koī mahfil to nahīñ

husn ko maiñ ne TuuT kar chāhā
husn ke dil meñ bhī qayām kiyā

shuhra-e-husn abhī kyā hai shabāb aane do
naam chamkegā tumhārā mah-e-tābāñ ho kar

sajī huī hai adab kī mahfil haal ke aise naġhmoñ se
be-maqsad be-kaif kitābeñ husn-e-taḳhlīqāt ke naam

vaqt ke hoñToñ pe raqsāñ haiñ mastī kā ik raag liye
sub.h-e-qayāmat ke hañgāme husn-e-maujūdāt ke naam