Tags-Husn

jāñ-sitāñ hai husn kyā husn-e-talab kī ehtiyāj
vo to zīnat ke liye ḳhanjar kaf-e-qātil meñ hai

samajhtā hai mirī aadat vo husn-e-be-parvā
sameT lūñgā use jab bikharne par hogā

hamesha husn sun ai bevafā nahīñ rahtā
kabhī zamāna sadā ek sā nahīñ rahtā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

dekh le jo aalam us ke husn-e-bālā-dast kā
hausla itnā kahāñ apnī nigāh-e-past kā

dil ne tumhāre husn ko baḳhshī haiñ rif.ateñ
dil ko magar nazar se girā.e hue ho tum

koh sañgīn haqā.eq thā jahāñ
husn kā ḳhvāb tarāshā ham ne

maiñ tire husn kā ḳhalvat meñ tamāshā.ī huuñ
ā.īna siikh na jaa.e kahīñ hairat merī

vo dil ko tire husn-e-ḳhud-ārā se ta.alluq
vo ḳhaak se paimān-e-nazar yaad to hogā

har gaam pe vo husn kī pur-hosh nigāheñ
vo ishq kā bad-mast safar yaad to hogā

ma.ani-e-husn o ma.ani-e-ḳhūbī
sūrat-e-yār suuñ huvaidā hai

chaman kī aañkh se mausam ke husn ko dekhūñ
bahār aa.e to pattoñ ke pairahan pahnūñ

husn kī har adā kī zad pe rahe
kitnī jur.at dil-o-jigar ne kī

ho tere husn kā jaadū ki merā josh-e-talab
nasha ye donoñ kā ik din utar hī jaanā hai

pūchho na araq ruḳhsāroñ se rañgīnī-e-husn ko baḌhne do
sunte haiñ ki shabnam ke qatre phūloñ ko nikhārā karte haiñ

shoḳhī shabāb husn tabassum hayā ke saath
dil le liyā hai aap ne kis kis adā ke saath

hazār baar huā imtihān-e-ishq magar
na jaane husn hai kyuuñ mujh se bad-gumāñ 'darshan'

vo jān-e-husn-o-latāfat hī ban ke aayā hai
bahār ġhuncha-ba-ġhuncha sabā chaman-ba-chaman

hazār aa.e zamāne meñ inqalāb magar
mizāj husn kā badlā na ishq hī kā chalan

ye husn-e-ḳhatm-e-safar ye tilism-ḳhāna-e-rañg
ki aañkh jhapkūñ to manzar nayā hai mere liye