Tags-Husn

merī rusvā.ī ne tere husn kī kī hai numūd
jab talak shabnam nahīñ ro.e to gul ḳhandāñ na ho

bahut achchhā thā jab nā-āshnā thā husn duniyā se
mujhe ab hosh-mandī āgahī taklīf detī hai

thā e'timād-e-husn se tū is qadar tahī
ā.īna dekhne kā tujhe hausla na thā

hai 'azīz' ā.īna-e-lafzī murā.ātun-nazīr
husn-e-ma.anī jab nahīñ phir shā.irī kis kaam kī

vo shoḳh apne husn pe maġhrūr hai 'asad'
dikhlā ke us ko aa.ina toḌā kare koī

husn-e-faroġh-e-shamma-e-suḳhan duur hai 'asad'
pahle Dil-e-gudāḳhta paidā kare koī

jo mere baad paḌhī jaa.e ek muddat tak
maiñ husn-o-ishq kī aisī kitāb likhūñgī

ḳhamosh nazroñ se husn-e-butāñ kī baat kareñ
na lab pe aa.ī jo us dāstāñ kī baat kareñ

ka.ī baar is kā dāman bhar diyā husn-e-do-ālam se
magar dil hai ki is kī ḳhāna-vīrānī nahīñ jaatī

insāñ se pyaar husn-parastī vatan se ishq
ham ne kiyā hai yuuñ ki misāloñ meñ aa.egā

asar ke sher meñ husn-o-kashīsh kī hai taujīh
na.ī jihat na sahī zeb-e-dāstān to hai

husn ne dī hazār baar shikast
ishq kī lantarāniyāñ na ga.iiñ

is kā ye taqāzā hai ki ahkām bajā laa.eñ
jis husn kā sarkār ke naukar bhī nahīñ ham

ye merī tujh se mohabbat agar ḳhatā hai to phir
yahāñ pe husn-e-ḳhatā kā mo.āmla hai huzūr

be-ḳhudī meñ bhī ḳhayāl-e-husn-e-ḳhuddārī rahe
naġhma-zan ho 'rāz' rañg-e-bazm-e-ġhurbat dekh kar

vāqi.a hai vāqi.a ahl-e-nazar se pūchhiye
husn bhī hairat meñ hai shān-e-mohabbat dekh kar

na tirī adā meñ vo dilkashī na mirī ġhazal meñ vo tāzgī
vo ġhubār-e-vaqt meñ dab ga.ī jo kashish thī husn-o-jamāl meñ

husn-e-sūrat dekh kar rañg-e-tabī.at dekh kar
mahv-e-hairat huuñ savād-e-bazm-e-ġhurbat dekh kar

husn-e-insāñ dafn ho jaane se miTtā hai kahāñ
phuul ban kar ḳhaak ke parde se bāhar aa gayā

kamāl-e-husn kā jis se tumheñ ḳhazāna milā
mujhe isī se ye andāz-e-āshiqāna milā