Tags-Husn

ai shah-e-husn ye qalameñ nahīñ aariz pe tire
kātibān-e-ḳhat-e-ruḳhsār qalam bhuul ga.e

bikhar jā.egā sab husn-e-chaman-bandī kā shīrāza
havā-e-sar-kashī meñ jab fazā-e-rañg-o-bū hogī

hasīn aaj utar aa.e husn-bāzī par
ye josh-o-tarz-e-numūd-e-jamāl kyā kahiye

aap kī shaan kā sāmān kahāñ se aayā
yūsuf-e-husn ke the aap ḳharīdār ki ham

kabhī aa.ine se nigāheñ milā kar jo lī hogī bharpūr añgḌā.ī tū ne
to ghabrā ke ḳhud terī añgḌā.iyoñ ne tire husn ko gudgudāyā to hogā

na tumhārā husn javāñ rahā na hamārā ishq javāñ rahā
na vo tum rahe na vo ham rahe jo rahā to ġham kā samāñ rahā

judā ho kar isī meñ jazb ho jaatī hai phir ik din
mohabbat āftāb-e-husn kī tanvīr hotī hai

har ik taraf se lapaktā hai dil pe kauñdā sā
ki tere husn kī haiñ qahar-māniyāñ pyāre

dhuup us husn kī yak-lahza mayassar to huī
phir na tā-umr lagā saa.e meñ rahnā achchhā

hijr ik husn hai is husn meñ rahnā achchhā
chashm-e-be-ḳhvāb ko ḳhūñ-nāb kā gahnā achchhā

kaun samjhegā mire husn-e-yaqīñ kā aalam
arsh o tuubā ko hijābāt-e-gumāñ kahtā huuñ

husn vafā ḳhuddārī ġhairat har ik kī nīlām huī
ham logoñ ne āḳhir ik din bastī ko bāzār kiyā

husn-e-bātin husn-e-zāhir se baḌī shai hai na bhuul
rañg haiñ donoñ ḳhudā ke gore aur kaale na dekh

vahīñ rah paḌe raah meñ husn-e-dost
jahāñ husn vāloñ kī bastī rahī

husn hī husn hai jis samt bhī uThtī hai nazar
kitnā pur-kaif ye manzar ye samāñ hai saaqī

is husn-parastī kā yahī hashr hai honā
kul umr mirī ishq meñ barbād rahegī

ġhunche chaTkeñ ki khileñ phuul baḌhe josh-e-numū
husn-e-pinhāñ kisī unvāñ se numāyāñ ho jaa.e

maiñ rusvā-e-ulfat vo mārūf-e-husn
baham shohratoñ meñ musāvāt hai

haiñ ḳhvāb bhī aur ḳhvāb kī ta.abīreñ bhī
haiñ husn bhī aur husn kī tanvīreñ bhī

bahs-e-niyāz-o-nāz thī kal bazm-e-husn meñ
'sīmāb' kuchh ḳhabar nahīñ kyā faisla huā