Tags-Husn

vasl kā sukūñ kyā hai hijr kā junūñ kyā hai husn kā fusūñ kyā hai ishq kā darūñ kyā hai
tum marīz-e-dānā.ī maslahat ke shaidā.ī rāh-e-gum-rahāñ kyā hai tum na jaan pāoge

jauhar-ījād-e-ḳhat-e-sabz hai ḳhud-bīnī-e-husn
jo na dekhā thā so ā.īne meñ pinhāñ niklā

gulshan-e-ishrat kā vo kyuuñ na nazāra kare
tujh chaman-e-husn kā dil kuuñ jo maalī kiyā

amīr-e-shahr kā husn-e-tadabbur
raqīboñ ko bhī apnā yaar jaanā

kyā husn ne samjhā hai kyā ishq ne jaanā hai
ham ḳhāk-nashīnoñ kī Thokar meñ zamānā hai

ishq kī betābiyoñ par husn ko rahm aa gayā
jab nigāh-e-shauq taḌpī parda-e-mahmil na thā

kis havāle se mujhe kis kā patā yaad aayā
husn-e-kāfir ko jo dekhā to ḳhudā yaad aayā

maiñ husn-e-mutlaq kī kursī par
baiTh kar

rūdād-e-mohabbat sun sun kar ḳhud husn ko bhī niiñd aane lagī
ab aur kahāñ se laa.eñ dil ab aur kahānī kyā kahiye

jo bāda-ḳhvār-e-ġham haiñ unheñ bhī kabhī kabhī
saaqī sharāb-e-husn ke sāġhar pilā ke dekh

kalām-e-pāk meñ hai zikr-e-hazrat-e-yūsuf
ye husn-o-ishq har ik dāstāñ meñ rahte haiñ

jo husn-o-ishq se amn-o-amāñ meñ rahte haiñ
kahāñ ke log haiñ vo kis jahāñ meñ rahte haiñ

tamām husn-e-jahāñ nā-tamām hai ki nahīñ
ye apsarā kā tasavvur ye jal-parī kyā hai

husn bhī vo na rahā pahlā sā dildār-e-hunar
aah pahlī sī vo ab azmat-e-tesha bhī kahāñ

shabāb-e-husn hai barq-o-sharar kī manzil hai
ye āzmā.ish-e-qalb-o-nazar kī manzil hai

yūsuf-e-husn agar ġham hogā
aap yāqūb nazar ā.iyegā

ajab dorāhe pe aa khaḌā huuñ
idhar tire husn kī dhanak hai

kuchh husn-e-vafā ke dīvāne phir ishq kī raah meñ kaam aa.e
ai kaash tamāshā karne ko ḳhud tū bhī kanār-e-bām aa.e

husn vāloñ kā pūchhnā kyā hai
jitne dilkash haiñ utne dil-āzār

ishq-e-be-imtiyāz ke hāthoñ
husn ḳhud bhī shikast-yāb huā