Tags-Husn

tajallī raaz hai sahrā-e-hastī
harīm-e-husn kā parda uThā kyā

tum ko har aan udhar hovegī husn-ārā.ī
ham ko har lahza idhar zauq-e-tamāshā hogā

vaj.h-e-qadr-o-qīmat-e-dil husn kī tanvīr hai
varna ik TuuTe hue shīshe kī kyā tauqīr hai

husn-e-talab ye hai ki tū us se usī ko maañg le
us ke sivā hayāt kyā maqsad-e-kā.enāt kyā

lan-tarānī kah diyā thā tuur par jis ne 'shakīl'
zarre zarre meñ usī ke husn kī tasvīr hai

tāb-e-yak-lahza kahāñ husn-e-junūñ-ḳhez ke pesh
saañs lene se tavajjoh meñ ḳhalal paḌtā hai

kisī ne husn-e-taġhāful se jaañ talab kar lī
kisī ne lutf ke dariyā bahā ke maar diyā

ai husn-e-yār sharm ye kyā inqalāb hai
tujh se ziyāda dard tirā kāmyāb hai

maiñ ishq-e-be-niyāz huuñ tum husn-e-be-panāh
merā javāb hai na tumhārā javāb hai

ai husn apnī hausla-afzā.iyāñ to dekh
maanā ki chashm-e-shauq bahut be-hijāb hai

bas yahī hai muḳhtasar tashrīh husn-o-ishq kī
vo tumhārī dāstāñ hai ye hai afsāna mirā

balā kī husn-var hai 'arshiyā-haq'
hasad rakhtī haiñ sab jannat kī hūreñ

maiñ nigāh-e-pāk se dekhe thā tire husn-e-pāk ko is pe bhī
mire jī meñ ḳhvāhish-e-vasl thī tire dil meñ bos-o-kanār thā

muskurāhaT hai husn kā zevar
muskurānā na bhuul jaayā karo

baat ho dair-o-haram kī yā vatan kī baat ho
baat jab ho dostoñ husn-e-chaman kī baat ho

chāñd kā husn to hai lā-sānī
phir bhī kitnā falak pe tanhā hai

bāham jo husn o ishq meñ yārāna ho gayā
koī parī banā koī dīvāna ho gayā

husn hotā hai kisī shai kā koī apnā hī
aur phir dekhne vaale kī nazar hotī hai

kyuuñ na zor-e-tab.a sab ahbāb dikhlā.eñ 'habīb'
imtihān-e-husn nazm-e-yak-digar shīshe meñ hai

nā-tavāñ merī tarah se hai jo ishq-e-husn se
koh se bhārī tarāzū meñ ho palla kaah kā