Tags-Husn

duur tak phail gayā husn-e-ma.ānī kā tilism
ḳhuub mafhūm mire lafz-o-bayāñ se niklā

tujhe nazdīk se bhī ek din vo dekh hī leñge
tasavvur meñ tirā husn-e-dil-ārā dekhne vaale

kuchh aisā partav-e-husn-e-azal ne kar diyā raushan
qayāmat tak to ab zarroñ kī tābānī nahīñ jaatī

shikve hue ki jaur hue sab hue tamām
vo husn-e-ittifāq se jab rū-ba-rū hue

husn kī rusvā.ī kā baa.is
ishq vafā tahzīb ke dushman

tujhe ai lāla-rū vo husn-e-rañgīñ hai ki gul-rūyāñ
abīrī pairahan karte haiñ terī gard-e-dāmāñ kī

ulajh ke rah ga.ī husn-e-naqāb meñ jo nazar
vo husn-e-jalva-e-zer-e-naqāb kyā jaane

tum apne husn kī khā kar qasam mukar jaao
agar tumhārī mohabbat ko mujh pe naaz nahīñ

vo sarāpā husn hai aur maiñ sarāpā ishq huuñ
saaz se dil us kā merā soz se ma.amūr hai

husn kī taḳhlīq meñ masrūf hai rabb-e-jahāñ
aur shā.ir husn kī tārīf par māmūr hai

karishma-sāzī-e-husn-e-tasavvurāt na pūchh
vo aa ga.e mire dil meñ ḳhayāl se pahle

mujh meñ mariyam kā taqaddus thā to siitā kā vaqār
kar diyā zar ne mujhe raunaq-e-husn-e-bāzār

hai 'amīr' dil meñ vahī chamak jo paḌī thī nuur kī ik jhalak
vahī ek partav-e-husn to mirī zindagī ko sajā gayā

gayā bazm-e-husn-o-jamāl meñ jo maiñ shauq-e-arz-e-talab liye
mire zehn-o-dil kā vo haal thā ki zabāñ se kuchh na kahā gayā

tasvīr khīñch lī hai tire shoḳh husn kī
merī nazar ne aaj ḳhatā ke maqām se

palle meñ tire husn ke go ho vo girāñ-tar
yūsuf ko tirā sañg-e-tarāzū na karūñ maiñ

jab tak na khuleñ mujh se tire husn ke uqde
hargiz havas-e-nāfa-e-āhū na karūñ maiñ

kab sham.a tere husn ke sho.ale ke rū-ba-rū
mahfil meñ kar sake kam-o-besh-e-ziyā se bahs

ab to ġhurūr-e-husn hai aisā butāñ tumheñ
mutlaq mahall-e-ḳhauf nahīñ hai ḳhudā se bahs

husn kī fitrat meñ dil-āzāriyāñ
us pe zālim nit-na.ī tayyāriyāñ