Tags-Husn

husn kī ehtiyāt-e-hasīñ dekh kar
ishq kā iltihāb-garāñ dekhiye

na barq na ḳhurshīd na sho.ala na bhabhūkā
kyuuñ sāhibo ye husn hai yā aur hī kuchh hai

masarratoñ meñ chhupā husn-e-dil ko kyā ma.alūm
ye regzār jamāl-e-bahār kyā jaane

ek chehrā thā jise husn atā kar na sake
ek kūcha thā jahāñ ḳhaak uḌaa.ī na ga.ī

husn jo rakhtā thā apnī zaat meñ
saat sifatāñ meñ dikhāyā hū-ba-hū

haañ haañ tumhāre husn kī koī ḳhatā nahīñ
maiñ husn-e-ittifāq se dīvāna ho gayā

husn samajh le ishq kī manzil
itnī ma.alūmāt nahīñ hai

thā bhī zalīl husn kī sarkār meñ ye dil
kam-baḳht ko supurd huā iltijā kā kaam

shaam aa.ī nahā kar tire husn meñ
chāñd taare falak par nikharte rahe

allāh tere husn-e-farozāñ kī pardagī
ik lau sī thartharā.ī pas-e-chashm-e-ashk-bār

ai husn-e-yār terī tajallī ko kyā huā
ye be-qarār dil mirā ab tak hai be-qarār

jab aisā husn qayāmat ho betāb na ho dil kyūñki 'nazīr'
jaan par apnī kheleñge ik roz ye ham ne jaanā hai

tan bhī kuchh gadrāyā hai aur qad bhī baḌhtā aatā hai
kuchh kuchh husn to aayā hai aur kuchh kuchh aur bhī aanā hai

ġhāfil itnā husn pe ġhurra dhyān kidhar hai tauba kar
āḳhir ik din sūrat ye sab miTTī meñ mil jā.egī

maiñ ne saarī duniyā meñ bas ek hasīna dekhī hai
baaqī koī husn nahīñ hai charba hai shahzādī kā

tū to hai husn-e-azal aur mirā rañg-e-ġhazal
merī āvāz meñ bhī kuchh to asar jaane de

us but ke bahr-e-husn meñ dil ko Duboiye
is kashtī-e-hayāt ko yuuñ paar utāriye

band āñkhoñ se na husn-e-shab kā andāza lagā
mahmil-e-dil se nikal sar ko havā taaza lagā

ishva-o-husn-o-adā par tirī marne vaale
kitne ma.asūm yūñhī umr gañvā dete haiñ

husn kā koī judā to nahīñ hotā andāz
ishq vaale unheñ andāz sikhā dete haiñ