Tags-Husn

diloñ meñ baiTh gayā barhaman kā husn-e-bayāñ
hadīs-e-shaiḳh tilismāt-e-radd-o-kad meñ rahī

ḳhayāl-e-husn kī maḳhmal pe tār-e-imkāñ se
kabhī gulāb kabhī māhtāb buntā huuñ

yā husn baḌh gayā hai had se ziyāda us kā
yā maiñ hī apne fan meñ ustād ho rahā huuñ

tum us kā husn kabhī us kī bazm meñ dekho
ki māhtāb sadā shab ke pairahan meñ khulā

ye husn-faroshī kī dūkān hai yā chilman
nazzāra kā nazzāra rūposhī kī rūposhī

husn kī ik nigāh jāñ-parvar
ishq kī aur zindagī kyā hai

ye husn-e-ḳhulūs-e-shikāyat bajā
magar kyā rahegā shikāyat ke ba.ad

tābish-e-husn se ik be-ḳhudī chhā.ī pahle
baad us ke huā phir kyā ye mujhe yaad nahīñ

husn-e-mah garche ba-hañgām-e-kamāl achchhā hai
us se merā mah-e-ḳhurshīd-jamāl achchhā hai

husn shāyad isī ko kahte haiñ
jab nazar lauT lauT jaatī hai

shab faroġh-e-bazm kā baa.is huā thā husn-e-dost
sham.a kā jalva ġhubār-e-dīda-e-parvāna thā

do roza husn par phūle haiñ kyā gul
baḌe kam-zarf haiñ itrā rahe haiñ

agar vo husn-e-dil-ārā kabhī ho jalva farosh
faroġh-e-nūr meñ gum zarf-e-bām ho jaa.e

tum apne va.adoñ kī iifā karo umiid nahīñ
jahāñ meñ husn ko be-e'tibār hone do

allāh rī ye nazākat-e-yak-jalva-e-nigāh
ḳhud un kā husn un kī tabī.at pe baar hai

rañgtoñ kā sail thā yā ḳhushbuoñ kī lahr thī
ab talak us husn meñ us jhiil meñ Duubā huuñ maiñ

aaj 'ḳhālid' ke ḳhayālāt kī har rāhguzar
hai tire husn ke partav se charāġhāñ jānāñ

ye ḳhilāf ho gayā āsmāñ ye havā zamāne kī phir ga.ī
kahīñ gul khile bhī to buuñd se kahīñ husn hai to vafā nahīñ

maiñ chalā aayā tirā husn-e-taġhāful le kar
ab tirī anjuman-e-nāz meñ rakkhā kyā hai

husn ko be-qusūr kahte haiñ
hai qusūr aap kā qusūr muaaf