Tags-Husn

sūrat-e-zāhirī ik parda-e-tārīk thī 'yās'
husn-e-ma.anī kā kan-āñkhiyoñ se nazāra hotā

ḳhūbān-e-jahāñ kī hai tire husn se ḳhūbī
tū ḳhuub na hotā to koī ḳhuub na hotā

taġhayyurāt ke aalam meñ zindagānī hai
shabāb faanī nazar faanī husn faanī hai

kyā ġhalat ishq ko hai jurm-e-vafā kā iqrār
husn par zahmat-e-bedād-o-jafā hai ki nahīñ

tū ki ik zarra-e-nāchīz thā ai husn-ma.āb
tujh ko ham-pāya-e-ḳhurshīd-o-qamar kis ne kiyā

khol kar āñkheñ zarā ye husn-e-mahr-o-māh dekh
diid ke qābil hai zarra charḳh par pahuñchā huā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

ishq āzār hī rahā merā
husn ījād kaun kartā hai

dupaTTa āb-e-ravāñ kā sar kā jo us kī mahram se samjhe ye ham
ki bahr-e-husn-e-sanam kā ham ko diyā dikhā.ī habāb aadhā

ai āftāb-e-husn mirī kyā bisāt hai
daryūza-gar huuñ nūr-e-qamar huuñ zarā Thahar

ai shahsavār-e-husn mujhe rauñd kar na jā
vāmāñda misl-e-rāhguzar huuñ zarā Thahar

nazar na aa.e mujhe husn ke sivā kuchh bhī
vo bevafā bhī agar hai to bevafā na lage

ai kaash terā husn hī asl-e-hayāt ho
terī nazar se ham ne haqīqat ko vā kiyā

ham ne to justujū ko bhī hai mudda.ā kiyā
ya.anī ki dil ke dard ko husn-e-navā kiyā

ishq hai aur kāñToñ kā bistar husn hai aur phūloñ kī sej
tujh ko kaise samjhā.ūñ ye duniyā kā dastūr hai chāñd

husn kī jins ḳharīdār liye phirtī hai
saath bāzār kā bāzār liye phirtī hai

tamām aalam huā jo shaidā to kuchh ta.ajjub nahīñ hai is kā
but-e-sitamgār tujh ko baḳhshā ḳhudā ne husn-o-jamāl kaisā

dekh letā huuñ tabassum husn kā
ġham-parastī merī fitrat hī sahī

husn kā anjām dekheñ ahl-e-husn
ishq merā be-haqīqat hī sahī

sarmāya-e-e.atibār de deñ tum ko
rañg-e-husn-e-bahār de deñ tum ko