Tags-Husn

ġhazab kā husn sahī terī sādgī meñ magar
pasand haiñ mujhe ai dost shoḳhiyāñ bhī bahut

sab kuchh mujhe 'ḳhayāl' kī duniyā meñ mil gayā
lekin tumhāre husn-e-nazar kī kamī rahī

husn kī barq-bāriyāñ tauba
ishq par tāza-kāriyāñ tauba

albatta hove matl.a-e-dīvān āftāb
tujh husn kī sifat meñ agar fard boliye

dāman-e-husn-e-talab zaḳhm kī daulat ke sivā
dard bhī ishq kī jāgīr meñ rakkhā gayā thā

tū ne ḳhauf-e-marg miTā diyā tū ne haq ko jiinā sikhā diyā
tū hasan husain kā peshvā tū alī-e-valī kā imaam hai

tirā ruup ruuh ke rū-ba-rū tirī priit parān meñ mū-ba-mū
tū kamāl-e-husn-e-kalām hai tū misāl māh-e-tamām hai

ik zarā ho nasha-e-husn meñ andāz-e-ḳhumār
ik jhalak ishq ke anjām kī āġhāz to de

huuñ agar laakh baar bhī sadqe
husn kā den adā nahīñ hotā

be-bahā dil ko nazr kartā kaun
husn agar dilrubā nahīñ hotā

ġhazab hai dilkashī husn-o-adā kī
javānī josh par aa.ī huī hai

ḳhairāt-e-husn kāsa-e-'rizvī' meñ Daal de
kuchh le ke hī uTheñge tire āstāñ se ham

dil hai ā.īna to askandar huuñ maiñ
husn kī daulat mirā nazrāna hai

husn kī ye garm-bāzārī rahegī tā-ba-kai
dekhnā ho jā.eñgī ye jins sastī ek din

mujhe is jhamak se aayā nazar ik nigār-e-ra.anā
ki ḳhur us ke husn-e-ruḳh ko lagā takne zarra-āsā

raaz ye mujh par shikast-e-ġhuncha-o-gul se khulā
husn bhī to be-niyāz-e-chāk-dāmānī nahīñ

kiran husn kī chhan ke aane lagī hai
ye parda hai āñchal hai chilman hai kyā hai

husn daulat dost duniyā dil nazar har ek shai
chhoḌ jā.ūñgā tirī ḳhātir ye sab ai zindagī

tirī āñkheñ tirā husn-e-javāñ tahrīr karte haiñ
zamīñ kī pastiyoñ meñ āsmāñ tahrīr karte haiñ