Tags-Ibaadat

dhyān meñ rahtā hai vo mus.haf-e-gul
har ghaḌī mahv-e-ibādat haiñ ham

ahl-e-duniyā se marāsim bhī baratne hoñge
har nafas sirf ibādat ho zarūrī to nahīñ

kisī ġharīb kī dil-jūī bhī ibādat hai
hai nek kaam kisī rote ko hañsā denā

ye naġhma sā ye 'khullar' sher terā
ibādat thā adā hone se pahle

farishtoñ se mohabbat kar rahe haiñ
javānī meñ ibādat kar rahe haiñ

duniyā mire sajde ko ibādat na samajhnā
peshānī pe qismat kā likhā kaaT rahā huuñ

ab ibādat kī yahī ek hai sūrat baaqī
aañkh ko band kiye hoñT sanā-ḳhvāñ rakhnā

dosto is se baḌī koī ibādat hī nahīñ
aadmī ko aadmī ke kaam aanā chāhiye

jo qalb ko zindagī na baḳhshe nazar ko kaif-o-ḳhudī na baḳhshe
vo zauq-e-sajda hai nañg-e-sajda ibādat-o-bandagī nahīñ hai

ishq-ibādat karte log
jāgeñ roz azānoñ tak

le ga.e log jabīnoñ meñ ibādat kā ġhurūr
kitne sajdoñ ko magar ḳhāk-basar chhoḌ ga.e

donoñ hī junūñ-ḳhezī ke tūfāñ meñ giraftār
tahzīb-e-ibādat na yahāñ hai na vahāñ hai

pahle safhe par sarkārī ḳhazāne kā hisāb hai
dūsre safhe par purohit ke jaarī karda ibādat ke ahkām

afsos ibādat na tirī ho sakī ham se
gardan nahīñ uThtī hai ki sharmā.e hue haiñ

duniyā meñ ibādat ko tirī aa.e hue haiñ
par husn-e-butāñ dekh ke ghabrā.e hue haiñ

tere bhītar kā ḳhudā jaag uThe
itnī shiddat se ibādat karnā

yaad rakhnā bhī ik ibādat hai
kyuuñ na ham un kā hāfiza ho jaa.eñ

zaat ke gard fasīleñ haiñ riyāzat ma.alūm
sirf jannat ke liye hai to ibādat ma.alūm