Tags-Ibaadat

jamā.at hai husn-e-ibādat magar
jo dil se na ho vo ibādat nahīñ

qabze meñ un ke shahr-e-tilismāt hī sahī
kho jā.ūñ kyā ḳhudā kī ibādat nahīñ karūñ

ye bhī mere liye ibādat hai
rāstoñ meñ diye jalātā huuñ

jis dar se dil ko zauq-e-ibādat atā huā
us āstān-e-shauq pe sajda ravā na thā

ġhurūr hī kā na bahrūp ho 'husain-ābid'
jo ijz tujh ko diyā hai tirī ibādat ne

tujhe hai apnī ibādat upar nazar kyūñkar
maiñ us ke fazl ke uupar nigāh kartā huuñ

yahī hai ibādat yahī diin o īmāñ
ki kaam aa.e duniyā meñ insāñ ke insāñ

varna jannat se kahāñ mujh ko nikālā jaatā
jo nahīñ kī vo ibādat mire kaam aa.ī hai

sarāpā rehn-e-ishq-o-nā-guzīr-e-ulfat-e-hastī
ibādat barq kī kartā huuñ aur afsos hāsil kā

ishq meñ har nafas ibādat hai
maz.hab-e-ishq ādamiyat hai

kyā bujhā pā.egī namrūd kī aag
vo ibādat jo hai Dar tak mahdūd

ye umr guzar jaa.e magar hosh na aa.e
sar shauq-e-ibādat meñ dar-e-yār pe ḳham hai

maiñ ibādat bhī huuñ maiñ mohabbat bhī huuñ zindagī kī numū kī alāmat bhī huuñ
merī palkoñ pe Thahrī namī ne kahā is namī ke liye ek taaza ġhazal

mirī musībat ye kah rahī hai ḳhudā mujhe aazmā rahā hai
mirī ibādat ye kah rahī hai ḳhudā ko maiñ aazmā rahā huuñ

tumhārī zulf-e-siyah pe tanqīd kis se likhvāūñ tum hī bolo
'shrī-ibādat-barelvī' ko maiñ taar de kar bulā rahā huuñ

ham meñ jauhar the ibādat ḳhaas ke
kar diyā insāñ ye miTTī ḳhvār kī

merī nazar meñ ye bhī ibādat ḳhudā kī hai
shafqat bharī nigāh se bachchoñ ko dekhnā

jazba-e-ishq meñ takmīl-e-ibādat ke liye
maiñ ne sar yaar ke qadmoñ meñ jhukā rakkhā hai

milā ke miTTī meñ rakh dī us ne ibādat us kī
jo mere aage na ḳham kiyā sar to maiñ ne dekhā

avval ġhazal ibādat kī
us ke ba.ad sharārat kī