Tags-Ilm

ilm kā maqsūd hai pāki-e-aql o ḳhirad
faqr kā maqsūd hai iffat-e-qalb-o-nigāh

kisī ko ilm nahīñ kaun kitnā pāgal hai
junūñ-divāna zarūrat se kuchh ziyāda hai

duniyā-e-ilm-o-fan meñ jo hāsil thā kal use
saarā kamāl charb-zabānī meñ kho gayā

mujhe ta.abīr kī ḳhvāhish thī yā shāyad nahīñ bhī thī
alam ḳhvāboñ kā le kar jā-ba-jā chaltā rahā huuñ maiñ

kahte haiñ zulm ke ba.ad aah karoge to kyā
lashkar-e-jaur-o-jafā meñ ye alam aur sahī

ye aish-o-tarab ke matvāle be-kār kī bāteñ karte haiñ
paa.el ke ġhamoñ kā ilm nahīñ jhankār kī bāteñ karte haiñ

fikr kī duniyā meñ columbus banā phirtā huuñ maiñ
ilm kī pahnā.ī kā kitnā baḌā faizān hai

had se baḌhe jo ilm to hai jahl dosto
sab kuchh jo jānte haiñ vo kuchh jānte nahīñ

ilm o hikmat meñ ho agar ḳhvāhish-e-feme
sarkār kī naukrī ko hargiz na kar aim

ai karam-farmā tujhe ho ilm us kā yā na ho
kaun tujh meñ kho ke aur phir ḳhud se begāna huā

matā-e-be-bahā hai dard-o-soz-e-ārzūmandī
maqām-e-bandagī de kar na luuñ shān-e-ḳhudāvandī

zindagānī ke fan se huuñ lā-ilm maiñ
zindagī karnā mujh ko sikhā zindagī

ḳhudā ke fazl se jūyā-e-ilm-o-dānihs ko
nabī sā shahr milā aur alī sā baab milā

vā kar diye haiñ ilm ne dariyā-e-ma.arifat
andhoñ ko ab bhī kashf o karāmāt chāhiye

tumheñ to ilm thā bastī ke log kaise haiñ
tum is ke ba.ad bhī kapḌe badalnā bhuul ga.e

na ilm-e-fitrat meñ tum ho māhir na zauq-e-tā.at hai tum se zāhir
ye be-usūlī bahut burī hai tumheñ na rakkhegī ye kahīñ kā

kahāñ ke ishq-o-mohabbat kahāñ ke ilm-o-hunar
ḳhumār-e-shauq ziyāda hai āgahī kam hai

ye bazm-e-shab hai yahāñ ilm-o-āgahī kam hai
ka.ī charāġh jale phir bhī raushnī kam hai

us kī ḳhātir ghar se bāhar Thahrā huuñ
varna ilm hai chābī gate pe rakkhī hai

jabr se nasl baḌhe zulm se tan mel kareñ
ye amal ham meñ hai be-ilm parindoñ meñ nahīñ