Tags-Imprisonment

azaañ pe qaid nahīñ bandish-e-namāz nahīñ
hamāre paas to hijrat kā bhī javāz nahīñ

kyā hogī talāfī mire nuqsān kī 'aḳhtar'
maiñ qaid meñ guzre hue arse kī tarah huuñ

ye sach hai maiñ huuñ qaid ḳhayāloñ meñ ḳhvāb meñ
jiine ke vāste mire duniyā koī to ho

tujhe bhī 'shād' apnī zaat se bāhar nikalnā hai
sadaf kī qaid se nikle hue gauhar batāte haiñ

darvesh qaid-e-ġham meñ dil-e-zār ho gayā
āzād ho gayā jo giraftār ho gayā

gumāñ kī qaid-e-hisār-e-qayās se niklo
kisī tarah se bhī is sabz ghaas se niklo

khet meñ jo chug rahī thī qaid meñ ghabrā ga.ī
gaañv kī mainā jo aa.ī shahr meñ dubrā ga.ī

balā se chuur kar do chuur kar do shīsha-e-dil ko
isī meñ qaid hasrat thī isī meñ band armāñ thā

mirī qaid-e-zīst ke saath hī hai ajal kī qaid lagī huī
huuñ sarīr meñ vo asīr-e-ġham jo qafas meñ bhī tah-e-dām hai

agar maiñ kahtā huuñ jiinā hai qaid-e-tanhā.ī
to zindagānī kī qīmat pe harf kyuuñ aa.e

zulfoñ meñ kiyā qaid na abrū se kiyā qatl
tū ne to koī baat na maanī mire dil kī

qaid haiñ ḳhvāb ik parinde ke
pinjre kī samt dekhtā kyā hai

yuuñ apnī zaat meñ ab qaid ho ke baiThā huuñ
ḳhud apne gird uThā.e the bām-o-dar maiñ ne

qaid meñ guzregī jo umr baḌe kaam kī thī
par maiñ kyā kartī ki zanjīr tire naam kī thī

qaid karnā kisī ko hai manzūr
zulf kartī hai tujh se sargoshī

qaid-e-maz.hab se mujh ko kyā matlab
maiñ nahīñ jāntā huuñ tiin aur pāñch

vo lamha bhar kī milī ḳhuld meñ jo āzādī
to qaid ho ga.e miTTī meñ ham sadā ke liye

kiyāñ makāñ taakā hai dil ne raat aur din se pare
be-zabāñ hote chale haiñ qaid-e-bām-o-dar meñ ham

qaid huuñ gumbad-e-be-dar meñ mirī apnī sadā
mujh tak aa.egī magar aa ke palaT jā.egī

junūñ zāhir huā ruḳh par ḳhudī par be-ḳhudī chhā.ī
ba-qaid-e-hosh maiñ jab bhī qarīb-e-āstāñ pahuñchā