Tags-Imprisonment

shaġhl-e-sayyād yahī sub.h o masā hotā hai
qaid hotā hai koī koī rihā hotā hai

janāb-e-ḳhizr ham ko ḳhaak raste par lagā.eñge
ki manzil be-ḳhudoñ kī hai muarra qaid-e-manzil se

apnī kamandeñ pheñk ke jis ko qaid kiyā hai zulmat ne
vo sūraj kab ubhregā kab phailegī tanvīr likho

mil nahīñ saktā ḳhudā hai is ḳhudī ke saath meñ
ai dil is qaid-e-ḳhudī se jald-tar ab chhūT chhūT

tere kufr-e-zulf kī Dorī meñ aksar ahl-e-dīñ
qaid-e-dīñ-dārī se bhāge haiñ nikal kar chhūT chhūT

vo rahe qaid-e-zamāñ meñ jo makīn-e-ām ho
lamha lamha jiine vāloñ kā makāñ koī nahīñ

ḳhudā kī tarh shāyad qaid haiñ apnī sadāqat meñ
ab apne gird afsānoñ ke pahre kar liye ham ne

anā to qaid kī tash.hīr se gurezāñ thī
pukār uTThī magar merī be-zabānī kyā

khule haiñ saare darvāze hamāre qaid-ḳhāne ke
ki darvāze talak zanjīr-e-zindānī nahīñ jaatī

maiñ qaid-e-haft-rañg se āzād ho gayā
kal shab naqab lagā ke makān-e-havās meñ

qaid-e-tanhā.ī se niklā huuñ abhī jān-e-safar
mujh se milnā mujhe zulfoñ meñ chhupā ke ronā

jhun-jhune de ke mire haath meñ koī mujh ko
qaid-e-hastī kī sazā de ye tamāshā kyā hai

chhoḌo kyā ronā le baiThe rañj-o-rāhat kā
qaid hī jab Thahrī hastī to behtar-vehtar kyā

saañp kī dum sī saḌak par chalte hue
mausam mujhe apnī kunDlī meñ qaid kar letā hai

kyā ḳhabar kab qaid-e-bām-o-dar se uktā jaa.e dil
bastiyoñ ke darmiyāñ sahrā bhī honā chāhiye

ḳhatā ke hote zamān-o-makāñ kī qaid ġhalat
na.ī fazā na.ī duniyā kā intizām kareñ

maiñ tirī qaid ko taslīm to kartā huuñ magar
ye mire bas meñ nahīñ hai ki parinda ho jā.ūñ

sukūt-e-shab toḌne kī ḳhātir bhī koī hañgāma saath rakhnā
na shaam hote hī har tamannā ko qaid-ḳhāne maiñ Daal denā

nafas ke jaal meñ kab qaid ho sakā 'arshad'
vo ik parind-e-fanā kū-ba-kū jo boltā hai

ai ham-safīr ab to chale qaid ho ke ham
taqdīr dekhiye hameñ phir kab dikhā.e baaġh