Tags-Imprisonment

maiñ divānā huuñ sadā kā mujhe mat qaid karo
jī nikal jā.egā zanjīr kī jhankār ke saath

pahle vo qaid-e-marg se mujh ko rihā kare
phir ho to bevafā.ī kā be-shak gila kare

thī qaid-e-zīst ki āġhosh-e-ġham kisī kī 'jigar'
ye ruuh jaa.e nikal kar kahāñ nahīñ ma.alūm

hai ek shart vafā kī vo qaid-e-be-zanjīr
sab iḳhtiyār haiñ aur kuchh bhī iḳhtiyār kahāñ

kisī ke saa.e ko qaid karne kā ik tarīqa batā rahā huuñ
ik us ke aage charāġh rakh de ik us ke pīchhe charāġh rakh de

merī sab āzādiyāñ banda-navāzī par nisār
ai ḳhoshā qaid-e-vafā zanjīr pahnāte ho tum

be-gunāhī zulmatoñ meñ qaid thī
daaġh phir kis ke samundar dho ga.e

qaid meñ rakkhā gayā qatra to ġhaltāñ ho gayā
nuur kī nahroñ ko nā-paidā karāñ honā hī thā

hameñ qatl hai yā hai ab qaid zālim
jo kuchh tujh se hove na taqsīr kiijo

bulbuleñ qaid-e-bāġhbāñ ġhāfil
gul-e-zardār kā ḳhudā-hāfiz

qaid-e-hastī se ba-mushkil ho sakā thā maiñ rihā
merī miTTī kāsa-gar kā chaak ho jā.egī kyā

saarī dhartī saare mausam ek hī jaise lagte haiñ
āñkhoñ āñkhoñ qaid hue the manzar manzar bikhre haiñ

parind har chand qaid to ho gayā hai lekin
har ik bun-e-mū se josh-e-parvāz boltā hai

nikal bhī saktā huuñ qaid-e-taḳhaiyyulāt se gar
vo shaḳhs khīñch le jis kā ḳhayāl khīñchtā hai

qaid-e-maz.hab vāqa.ī ik rog hai
aadmī ko chāhiye āzād ho

qaid ho kar aur bhī zindāñ meñ uḌtā hai ḳhayāl
raqs zanjīroñ meñ bhī karte haiñ āzādāna ham

ḳhud ke andar hī qaid ho baiThā
apne pinjre meñ hī paḌā huuñ maiñ

umīdeñ jab mirī baḌh aa.iiñ to hañs kar lage kahne
ye barsoñ qaid dil meñ rah ke kyuuñ ghabrā nahīñ jātīñ

har-dam badan kī qaid kā ronā fuzūl hai
mausam sadā.eñ de to bikhar jaanā chāhiye

maut jis se najāt detī hai
qaid aisī hī zindagī meñ huuñ