Tags-Imprisonment

ruuh ko qaid kiye jism ke hāloñ meñ rahe
log makḌī kī tarah apne hī jāloñ meñ rahe

mujrim the jo ham so qaid hue sayyād magar ab ye to batā
har vaqt ye kis ko DhūñDte haiñ dīvār ke saa.e zindāñ meñ

makḌī ke jāloñ meñ kab se qaid haiñ raushan-dān mire
haa.e kyā socheñge ghar ko dekh ke kal mehmān mire

daur-e-ḳhizāñ meñ dil ke bahalne kā hai sabab
āñkhoñ meñ merī qaid nazāra bahār kā

be-qaid-o-rusūm aa.ī haiñ gulshan meñ bahāreñ
ab haath garebāñ kī taraf jā nahīñ sakte

mirī umr ke ik ik lamhe ko maiñ ne qaid kiyā hai lafzoñ meñ
jo haarā huuñ yā jiitā huuñ vo sab sarmāya ghar meñ hai

maut aa jaa.e qaid meñ sayyād
aarzū ho agar rihā.ī kī

nau-giraftār-e-mohabbat kabhī āzād na ho
qaid meñ qaid rahe qaid kī mī.ād na ho

mujhe to qaid-e-mohabbat aziiz thī lekin
kisī ne mujh ko giraftār kar ke chhoḌ diyā

lafz kī qaid-o-rihā.ī kā hunar
kaam aa hī gayā āḳhir mere

duur khaḌā ho kar maiñ is liye pahroñ dekhtā rahtā huuñ
qaid bahut sī yādeñ haiñ mirī is vīrān havelī meñ

rañg aur ḳhushbū kī mānind hai merā sarāpā bhī sāhib
qaid rakhegā āḳhir kab tak vaqt mujhe yuuñ muTThī meñ

ye tajrabāt kī vus.at ye qaid-e-saut-o-sadā
na pūchh kaise kaḌe haiñ ye arz-e-hāl ke din

rindān-e-ishq chhuT ga.e maz.hab kī qaid se
ghanTa rahā gale meñ na zunnār rah gayā

kin kin kī ātmā.eñ pahāḌoñ meñ qaid haiñ
āvāz do to bajte haiñ patthar ke daf yahāñ

aanā hai us kī qaid meñ har ik vajūd ne
lagnī hai har vajūd pe ta.azīr ḳhaak kī

shahr ke hākim kā ye farmān hai
qaid meñ kahlā.eñge āzād sab

zāhir hai tarz-e-qaid se sayyād kī ġharaz
jo daana daam meñ hai so ashk-e-kabāb hai

yuuñ qaid ham hue ki havā ko taras ga.e
apne hī kaan apnī sadā ko taras ga.e

raat ke ba.ad vo sub.h kahāñ hai din ke ba.ad vo shaam kahāñ
jo āshufta-sarī hai muqaddar us meñ qaid-e-maqām kahāñ