Tags-Imprisonment

tire jamāl ke sab bhed jaan kar bhī maiñ
na jaane kyuuñ tire ḳhvāboñ meñ qaid rahtā huuñ

vo zindagī ho ki aqlīm-e-zāt ho 'shāriq'
na jaane kaise ḳharāboñ meñ qaid rahtā huuñ

zamāne bhar kī kitāboñ meñ qaid rahtā huuñ
ḳhirad ke kohna nisāboñ meñ qaid rahtā huuñ

hai mauj-e-vaqt qafas aur zindagī sayyād
maiñ lamha lamha habāboñ meñ qaid rahtā huuñ

buuñd jab thī bādal meñ zindagī thī halchal meñ
qaid ab sadaf meñ hai ban ke hai guhar tanhā

āzād kiye qaid siiñ tasbīh kī us kuuñ
hai gardan-e-zunnār pe ehsān hamārā

merī rasā.ī merī hadoñ tak terī fazā meñ tū bhī qaid
tū mujh tak aa.e to kyūñ-kar tujh tak kaise pahuñchūñ maiñ

jab dā.eroñ meñ hī kaTī hai zindagī
dil qaid se be-bāt jhulsātā hai kyuuñ

qaid-e-ġham-e-hayāt bhī kyā chiiz hai 'fanā'
rāh-e-farār mil na sakī umr-bhar phire

hazār qaid-e-javāñ se chhuT kar bahār kā aasrā kareñge
bahār bhī ham qafas-zadoñ ko na raas aa.ī to kyā kareñge

bajā ki dil nahīñ zindān-e-be-ḳhudī kā asiir
magar ye qaid-e-anā se kahāñ rahā hogā

ye qaid-e-umr to kaTtī nazar nahīñ ātī!
bas ik qarīna! tirā dhyān, ek Dhab! tirī yaad

jaatī huī rut kab ruktī hai ai dil ye abas tadbīreñ haiñ
jo qaid havāoñ ko kar leñ kyā aisī bhī kuchh zanjīreñ haiñ

maiñ apnī muTThiyoñ meñ qaid kar letā zamīnoñ ko
magar mere qabīle ko bikhar jaane kī jaldī thī

abhī bādaloñ kā safar kahāñ mire mehrbāñ
abhī qaid huuñ sar-e-āshiyāñ mire mehrbāñ

vo qaid-o-band kī jhelī haiñ saḳhtiyāñ jis ne
uḌā.īñ jabr-o-ġhulāmī kī dhajjiyāñ jis ne

qaid-e-hayāt o band-e-ġham asl meñ donoñ ek haiñ
maut se pahle aadmī ġham se najāt paa.e kyuuñ

pā-e-junūñ meñ paḌī huī haiñ hirs-o-havā kī zanjīreñ
qaid hai ab tak haath sahar kā tārīkī ke kañgan meñ

duniyā se dar-guzar ki guzargah ajab hai ye
darpesh ya.anī 'mīr' hai jaanā jahāñ se bhī

raat ke ba.ad vo sub.h kahāñ hai din ke ba.ad vo shaam kahāñ
jo āshufta-sarī hai muqaddar us meñ qaid-e-maqām kahāñ