Tags-Independence

naqsh baiThe hai kahāñ ḳhvāhish-e-āzādī kā
nañg hai naam rihā.ī tirī sayyādī kā

be-karāñ vaqt kī bandish se milī āzādī
chand lamhoñ ke liye maiñ bhī huā āvāra

qurbateñ hote hue bhī fāsloñ meñ qaid haiñ
kitnī āzādī se ham apnī hadoñ meñ qaid haiñ

jism-e-āzādi meñ phūñkī tū ne majbūrī kī ruuh
ḳhair jo chāhā kiyā ab ye batā ham kyā kareñ

na hogā rā.egāñ ḳhūn-e-shahīdān-e-vatan hargiz
yahī surḳhī banegī ek din unvān-e-āzādī

gul-bār ridā-e-āzādī sarshār javānī kā parcham
ye amn ke naġhmoñ kā mutrib ḳhāmosh baġhāvat kā ye alam

nau-e-insāñ fasl-e-āzādī meñ bhī
pā-ba-jaulāñ hai na jaane kis liye

milī to hai mirī tanhā.iyoñ ko āzādī
juḌī huī haiñ kuchh āñkheñ magar darīche meñ

shauq-e-āzādī meñ taḌpūñ us pe raazī dil na thā
varna betābī salāmat chhūTnā mushkil na thā

āzādī merī ruuh ko dilvā.egī ajal
kab tak rakhegī zindagī apne hisār meñ

ye tanhā.ī ye āzādī kā aalam
maza aane lagā hai zindagī kā

aisī āzādī ab aur kahāñ hogī
ishq meñ sab karne kī ijāzat hotī hai

vo lamha bhar kī milī ḳhuld meñ jo āzādī
to qaid ho ga.e miTTī meñ ham sadā ke liye

usī ko sochnā paḌtī haiñ tadbīreñ rihā.ī kī
jo taa.ir jurm-e-āzādī meñ zer-e-dām hotā hai

dasht se āzādī kī havā.eñ un ko bulāne aatī haiñ
ahl-e-junūñ ko rokne vaalī kaun sī hai zanjīr likho

vahī jiine kī āzādī vahī marne kī jaldī hai
divālī dekh lī ham ne dasahre kar liye ham ne

sab ulTī paḌ rahī haiñ shāyad āzādī kī tadbīreñ
ki zanjīr-e-mohabbat aur mohkam hotī jaatī hai

ek āzādī ki zindānī-e-ḳhvāhish kar de
ik asīrī ki karāñ-tā-ba-karāñ le jaa.e

ḳhudā mahfūz rakkhe ḳhauf-e-āseb-e-asīrī se
maiñ gulshan meñ bhī āzādī kā naġhma gā nahīñ saktā

fitrat hai azal se pābandī kuchh qadr nahīñ āzādī kī
nazroñ meñ haiñ dilkash zanjīreñ ruḳh jānib-e-sahrā kaun kare