Tags-Independence

donoñ jānib qaid-shuda is ḳhush-fahmī meñ rahte haiñ
sarhad ke us paar parinde āzādī meñ rahte haiñ

kitnī is daur meñ āzādī hai majbūroñ ko
ḳhauf kī aag meñ jalte hue par jānte haiñ

āzādī kī dhūmeñ haiñ shohre haiñ taraqqī ke
har gaam hai paspā.ī har vaz.a ġhulāmāna

haath se haath jhaTak de ki use thāme rakhe
us ko āzādī hai jab chāhe vo jī aa.ī kare

nahīñ duniyā meñ āzādī kisī ko
hai din meñ shams aur shab ko qamar band

bād-e-āzādī meñ ham sab nāchne vāloñ ke saath
phuul pahne raqs kartī Dāliyāñ shāmil huiiñ

mirī sadā hai gul-e-sham-e-shām-e-āzādī
sunā rahā huuñ diloñ ko payām āzādī

sab jis ko asīrī kahte haiñ vo to hai amīrī hī lekin
vo kaun sī āzādī hai yahāñ jo aap ḳhud apnā daam nahīñ

ham āzādī ke dīvāne ye duniyā farzānoñ kī
is paapī sansār meñ baabā kaun sune dīvānoñ kī

maiñ ḳhvāb kī āzādī
apne andar lā kar

merī āzādī vaaq.e ho chukī
maiñ us kā mahall-e-vaqū

kaam adhūrā aur āzādī
naam baḌe aur thoḌe darshan

itnī āzādī bhī ġhanīmat hai
saañs letā huuñ baat kartā huuñ

āzādī ke phal rañgīñ rañgīñ khāne meñ bahut mīThe mīThe
kiiḌe haiñ magar andar andar ma.alūm nahīñ kyā honā hai

the raqam jin meñ jihād-o-jañg-e-āzādī ke baab
tāq-e-nisyāñ meñ unhī aurāq ko pheñkā gayā

ai mire hindostāñ jannat-nishāñ
bām-e-āzādī ke ḳhush-anjām ziine ke liye

chheḌtī hai mujhe aa aa ke mirī āzādī
go maiñ qaidī huuñ mire paañv meñ zanjīr bhī hai

āzādī-e-nasīm mubārak ki har taraf
TuuTe paḌe haiñ halqa-e-dām-e-havā-e-gul

ab to paiġhām atā ho koī āzādī kā
ab to ik umr huī hai tire zindāñ meñ mujhe