Tags-Independence

chalnā bhī ik aadat hai bas
saarī thakan āzādī kī hai

qaid meñ ārām āzādī vabāl
ham giraftāroñ kā zindāñ aur hai

qaid sī lagne lagī hai mujh ko ye āvārgī
ab to āzādī bhī merī ik sazā bantī huī

āzādī meñ rahne vaale dekho kaise rahte haiñ
apne saa.e se Darte haiñ chauñke chauñke rahte haiñ

baiThe baiThe āzādī ke ḳhvāb sajāte rahte haiñ phir
pairoñ kī zanjīr ko takte takte thak kar so jaate haiñ

vo duniyā sham-e-āzādī ke parvānoñ kī bastī thī
jahāñ fitrat sañvartī thī jahāñ mastī barastī thī

qafas-nasīb haiñ nā-āshnā-e-āzādī
ye qaid ek chunautī hai bāl-o-par ke liye

ġhulāmī ko to āzādī samajhte haiñ yahāñ insāñ
ye hathkaḌiyoñ meñ kar leñge guzārā ham na kahte the

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

kashākash-hā-e-hastī se kare kyā sa.i-e-āzādī
huī zanjīr mauj-e-āb ko fursat ravānī kī

ulfat-e-gul se ġhalat hai dāva-e-vārastagī
sarv hai bā-vasf-e-āzādī giraftār-e-chaman

kisī ke ho raho achchhī nahīñ ye āzādī
kisī kī zulf se lāzim hai silsila dil kā

vo jab bhī diin meñ 'tamjīd' āzādī kī bāteñ hoñ
ye lāzim hai ki lā-ikrāh ho irshād ho sāhab

kuchh āzādī ke matvāle, jaañ kaf pe liye maidāñ meñ ga.e
har-sū dushman kā narġha thaa, kuchh bach nikle, kuchh khet rahe

ba-saḳhtī-hā-e-qaid-e-zindagī mālūm āzādī
sharar bhī said-e-dām-e-rishta-e-rag-hā-e-ḳhārā hai

tīsrī duniyā munavvar ho mire afkār se
mehr-e-āzādī mire ehsās ke andar nikal

kisī ko fikr-e-āzādī nahīñ is qaid-e-rañgīñ se
dil-e-ālam pe hai chhā.ī huī mohr-e-butāñ kaisī

hamāre arsa-e-shatrañj meñ hai shaah dīvāna
jise hāsil ho āzādī use ardab se kyā matlab

milī hai jab se unheñ bolne kī āzādī
tamām shahr ke aḳhbār jhuuT bolte haiñ