Tags-Insaan

shakl insān kī ho chaal bhī insān kī ho
yuuñ bhī aatī hai qayāmat mujhe ma.alūm na thā

in havāoñ meñ namī hai 'rāhil'
koī insān salāmat hai abhī

jo ho sake to karo aam lā-ubālī-pan
ḳhudī ke bojh se insān TuuT jaatā hai

ham farishte kahāñ se ban jaa.eñ
ishq insān kī jibillat hai

un ke aate hī badal jaate haiñ tere tevar
ai safī' chāhiye insān kī niyyat achchhī

gudāz qalb ḳhushī se bhalā kisī ko milā
aziim vasf hī insān kā udāsī hai

banā diyā use insān terī qurbat ne
tire firāq meñ jo jānvar banā huā thā

aadmī to sab hī kahlāte haiñ lekin ḳhalq meñ
us kā rutba aur hai jo aadmī insān hai

be-piye shaiḳh farishta thā magar
pī ke insān huā jaatā hai

ġham tirā jalva-gah-e-kaun-o-makāñ hai ki jo thā
ya.anī insān vahī sho.ala-ba-jāñ hai ki jo thā

marte dam tak sab mujh ko insān kaheñ
aisā hī kirdār mirā ho yā-allāh

ye mazāhib to apnī jagah haiñ magar ai 'nahīf' is se insān hai be-ḳhabar
tū hai insān insān se pyaar kar yahī insān sachche kī pahchān hai

hādī-e-dīn jitne bhī aa.e yahāñ saarī duniyā ko un kā ye paiġhām thā
nahīñ insāniyat jis meñ insāñ nahīñ jis meñ insāniyat hai vo insān hai

ye chhuā chhūt hai dushmanī kā sabab ham-vatan haiñ to phir hai ye tafrīq kyuuñ
ik barahman hai aur ek janjāt hai vo bhī insān hai vo bhī insān hai

hindū hai sikh hai muslim hai īsā.ī hai jo bhī hai vo vatan kā nigahbān hai
ye na dekho ki vo kaam kartā hai kyā kaam kuchh bhī kare āḳhir insān hai

sahīfoñ meñ kahīñ tahrīr raushan thī yahī 'rāhī'
zamīñ par the kabhī insān insānoñ se vābasta

isī insān meñ sab kuchh hai pinhāñ
magar ye ma.arifat dushvār bhī hai

ilm zāhir aur bātin lāzim-o-malzūm haiñ
jo na samjhe us ko vo insān aadhā rah gayā

insān ke har ġham pe 'sabā' choT lagī hai
shīshe ke chaTaḳhne kī bhī thī kitnī sadā tez

DhūñDh ham un ko pareshān bane baiThe haiñ
vo to parda liye insān bane baiThe haiñ