Tags-Insaan

dīvāroñ ke is jañgal meñ bhaTak rahe insān
apne apne uljhe dāman jhaTak rahe insān

hazāroñ baras se mirī aatmā uuñgh meñ phañs ga.ī thī
jab insān do pattharoñ ko ragaḌ kar kuhan-sāl sūraj kī surḳh aatmā ko bulāne lagā thā

ik ajab āshob hai kyuuñ bastiyoñ meñ jalvagar
kyā ye har insān se ḳhauf-e-ḳhudā le jā.egā

hāsil-e-ishq agar kuchh hai to vahshat hai 'ziyā'
aur insān mukammal nahīñ vahshat ke baġhair

kiije zamīr-e-ḳhāk ko aadam kī chhān agar
us shakl kā ban aave na insān dūsrā

insān hādsāt se kitnā qarīb hai
tū bhī zarā nikal ke kabhī apne ghar se dekh

duniyā pe aisā vaqt paḌegā ki ek din
insān kī talāsh meñ insān jā.egā

bachā ke maut se insān ḳhud ko rakh letā
jo ghuñghrū hote kahīñ hādsoñ ke paañv meñ

insān rakkhe ishq kī nisbat se imtiyāz
yuuñ qaid-e-ḳhvāb-o-ḳhur meñ to har vahsh va tair hai

munsif ho 'muhib' dil meñ is baat ko Tuk soche
jab be-sar-o-sāmāñ ho insān mirā sāhab

ehsās kī manzil se guzar jā.egā āḳhir
mujh meñ hai jo insān vo mar jā.egā āḳhir

siine meñ liye jiine ke armān hazāroñ
mar jaate haiñ har din yahāñ insān hazāroñ

mujh ko bhañvrā na samajh mujh ko patañgā na samajh
mujh ko insān samajh merī sadāqat se na khel

de rahe haiñ maat ab shaitān ko
kārnāme hazrat-e-insān ke

naaz hai kis baat par insān ko
kis tarah chaltā hai siina taan ke

ye alag baat ki vo mujh se ḳhafā rahtā hai
maiñ ik insān huuñ aur mujh meñ ḳhudā rahtā hai

to phir āñkhoñ meñ sapne ek se kyūñkar nahīñ ugte
lakīroñ ke agar donoñ taraf insān hote haiñ

har ik insān ke a.amāl bhī yaksāñ nahīñ hote
koī ghar toḌ detā hai koī ta.amīr kartā hai

kyā soch ke insān se sharmā.e hue haiñ
dete nahīñ dīdār sar-e-ām farishte

jannat se nikālā huā insān vahī hai
shaitān bane baiThe haiñ nākām farishte