Tags-Intezar

maut kā intizār baaqī hai
aap kā intizār thā na rahā

kyā yahī hotī hai shām-e-intizār
āhaTeñ ghabrāhaTeñ parchhā.iyāñ

kabhī to chauñk ke dekhe koī hamārī taraf
kisī kī aañkh meñ ham ko bhī intizār dikhe

pathrā ga.ī thī aañkh magar band to na thī
ab ye bhī intizār kī sūrat nahīñ rahī

chehre se kab ayaañ hai mire iztirār bhī
lekin maiñ kar rahā huuñ tirā intizār bhī

aur duur is fasīl-e-shām se duur
chāñd kā intizār hai tum ko

jo maiñ ne intizār-e-yār khīñchā
mirā ghar ban ga.ī duniyā simaT ke

vo kisī galileo kā intizār nahīñ kar rahe haiñ
ek baḌī ghaḌī tayyār karne ke liye

havā ke ruḳh pe rah-e-e'tibār meñ rakkhā
bas ik charāġh kū-e-intizār meñ rakkhā

ukhaḌ ke dahlīz dar kī chaukhaT se kitnī duur pe jā paḌī hai
hai kitnī shiddat se un rutoñ meñ tumheñ merā intizār likhnā

vo na aa.egā hameñ ma.alūm thā is shaam bhī
intizār us kā magar kuchh soch kar karte rahe

vo koī apne sivā ho to us kā shikva karūñ
judā.ī apnī hai aur intizār apnā hai

ab ke na intizār kareñ chāragar ki ham
ab ke ga.e to kū-e-sitamgar ke ho ga.e

sust-paimān o be-niyāz sahī
husn tasvīr-e-intizār bhī hai

maiñ kyā karūñ yahīñ karnā hai intizār mujhe
isī jagah to milā thā vo pahlī baar mujhe

havā kā ruḳh to kisī pal badal bhī saktā hai
us ek pal kā zarā intizār tum bhī karo

hamāre saath umīd-e-bahār tum bhī karo
is intizār ke dariyā ko paar tum bhī karo

siine meñ aag aañkh sū-e-dar lagī rahe
kaam intizār-e-yār meñ ai dil yahī rahe