Tags-Ishq

kaisā hī koī kyuuñ na ho koī chālāk shahsavār
guzrā jo rāh-e-ishq meñ vo sar ke bal gayā

jism aisā ghul gayā hai mujh marīz-e-ishq kā
dekh kar kahte haiñ sab tāvīz hai baazū nahīñ

dāna-o-dām sambhālā mire sayyād ne phir
apnī gardan hai vahī ishq kā phandā hai vahī

ġham agarche jāñ-gusil hai pa kahāñ bacheñ ki dil hai
ġham-e-ishq gar na hotā ġham-e-rozgār hotā

kahīñ na dāman-e-ādāb-e-ishq ko chhoḌā
firāq hī kī tarah ham visāl se guzre

ishq meñ tere luTe sab durr-e-ashk
aisī var-ḳharchī ne ghar ghālā miyāñ

ishq ke zevar ko aañsū mat kaho
motiyoñ kī hai ye gul-mālā miyāñ

ishq aur dast-e-talab aisī bhī kyā majbūrī
shauq ko kāvish-e-daryūza-garī ne maarā

ishq meñ ye majbūrī to ho jaatī hai
duniyā ġhair-zarūrī to ho jaatī hai

ishq kā aalam judā hai husn kī duniyā judā
mujh ko ābādī se kyā aur tum ko vīrāne se kyā

husn hai kāfir banāne ke liye
ishq hai īmān laane ke liye

koī 'shārib' koī 'mullā' koī 'ġhālib' koī 'mīr'
manzil-e-ishq se guzre haiñ divāne kyā kyā

maiñ nikal ke bhī tire daam se na girūñgā apne maqām se
maiñ 'qatīl'-e-teġh-e-jafā sahī mujhe tujh se ishq zarūr hai

vādī-e-ishq meñ 'inshā' tū sambhal kar jaatā
haañ ḳhabar-dār ki ye raah bahut hai tārīk

ishq meñ ahl-e-vafā kitne aziyyat-kosh haiñ
ḳhuun dil kā ho rahā hai lab magar ḳhāmosh haiñ

mujh ko tanhā dekhne vaale na samjheñ rāz-e-ishq
merī tanhā.ī ke lamhe yaar ke āġhosh haiñ

jinheñ ishq-e-dilī hai vo tumhārā naam japne ko
tahārat se hamārī ḳhaak kī misran banāte haiñ

salāh-e-ishq de de kar kiye dete haiñ ḳhud rafta
tire shaidā.ī dil se dost ko dushman banāte haiñ

kahānī ishq kī ya.anī yahī hai
yahī hai aag aur paanī yahī hai

himmat-afzā hai har ik uftād rāh-e-ishq kī
Thokareñ khātā huuñ girtā huuñ sambhal jaatā huuñ maiñ