Tags-Ishq

ishq mujh ko nahīñ vahshat hī sahī
merī vahshat tirī shohrat hī sahī

ham koī tark-e-vafā karte haiñ
na sahī ishq musībat hī sahī

ishq meñ sachchā thā vo merī tarah
bevafā to āzmāne se huā

mumkin nahīñ maiñ chhuT sakūñ dām-e-vafā-o-ishq se
bāñdhe ga.e sab dast-o-pā jakḌī ga.ī ek ek nas

tū aur da.avā ishq kā ye bhī ḳhudā kī shaan hai
mansūr banñe ke liye dil chāhiye ai bul-havas

hai bazm-e-jahāñ meñ nā-mumkin be-ishq salāmat husn rahe
parvāne to jal kar ḳhaak hue ab sham.a bhī jaltī jaatī hai

tere ishq ne mujh ko fan ye baḳhshā hai
paanī pe tasvīr banāyā kartā huuñ

ishq kī bīmārī hai jin ko dil hī dil meñ galte haiñ
murde haiñ vo haqīqat meñ zāhir meñ phirte chalte haiñ

ġhairat-e-ishq salāmat thī anā zinda thī
vo bhī din the ki rah-o-rasm-e-vafā zinda thī

apnī har baat pe hotā hai vilāyat kā gumāñ
ishq ne kaise tilismāt meñ rakkhā huā hai

mazāq-e-ishq se maiñ sharmsār ho na sakā
ki rāzdāñ bhī mirā rāzdār ho na sakā

shabāb-o-ishq kī kul umr ek lamha thī
mujhe ye lamha magar sāzgār ho na sakā

jo bilā tabsira paḌhī jaa.e
ishq kī aisī dāstāñ se bacheñ

husn hai kāfir banāne ke liye
ishq hai īmān laane ke liye

māñgtā huuñ bāda-e-ishq-e-davām
tishnagī apnī baḌhāne ke liye

ishq hai ḳhud imtihāñ jān-e-azīz
āzmāne āzmāne ke liye

qismat se mil ga.ī hai ye bedārī-e-hayāt
is ishq ke nisār ki duniyā nazar meñ hai

ishq meñ ishq kā unvāñ nahīñ dekhā jaatā
dard meñ dard kā darmāñ nahīñ dekhā jaatā

ba-nām-e-ishq-o-havas kuchh na kuchh rahe raushan
kuchh aisā ho ki ye saude kabhī saroñ se na jaa.eñ

mohabbat ḳhauf-e-rusvā.ī kā baa.is ban hī jaatī hai
tarīq-e-ishq meñ apnoñ se pardā ho hī jaatā hai